Засгийн газрын хуралдаанаар Мансууруулах, сэтгэцэд нөлөөт бодисын эргэлтэд хяналт тавих тухай хуулийн шинэчилсэн найруулгын төслийг дэмжиж, УИХ-д өргөн мэдүүлэхээр шийдвэрлэсэн тухай Хууль зүй, дотоод хэргийн дэд сайд Д.Мөнх-Эрдэнэ мэдээлэл хийлээ.  Түүний байр суурийг хүргэе.  

Тэрээр “Хар тамхи, мансууруулах бодисын хэрэглээний өсөлт нь нийгэмд ихээхэн түгшүүр төрүүлж байна. Засгийн газрын зүгээс энэ асуудлыг үндэсний аюулгүй байдалд заналхийлэх хэмжээнд хүрсэн гэж үзэж байгаа. Анх 2002 онд энэ төрлийн гэмт хэргийн тухай хууль батлагдаж байх үед ердөө хоёрхон хэрэг бүртгэгдэж байсан. Харин өнөөдөр энэ тоо тогтмол өссөөр, 2025 оны байдлаар хар тамхи, мансууруулах бодистой холбоотой 307 гэмт хэрэг, 394 зөрчил бүртгэгдээд байна. Энэ нь өмнөх оны мөн үетэй харьцуулахад гэмт хэрэг 20 хувиар, зөрчил 26.6 хувиар тус тус өссөн үзүүлэлт юм.

Хуулийн шинэчилсэн найруулгад хэд хэдэн чухал өөрчлөлт тусгагдсан. Нэгдүгээрт, хар тамхины хэрэглээний хор уршиг, аюул заналыг иргэдэд ойлгуулах, нийгэмд таниулах чиглэлээр соён гэгээрүүлэх ажлыг хууль эрх зүйн хүрээнд тодорхой зохицуулах боломжийг бүрдүүлсэн. Нөгөө талаас, хууль сахиулах байгууллагын чадавхыг бэхжүүлэх, төрийн бүх шатны байгууллагуудын хэрэгжүүлэх арга хэмжээг илүү тодорхой болгож өгсөн. Мөн Монгол Улс олон улсын конвенцоор хүлээсэн үүргийнхээ хүрээнд, энэ асуудлыг үндэсний аюулгүй байдалтай холбоотой ноцтой асуудал гэж үзэж байгаа учраас хар тамхи, мансууруулах бодистой холбоотой үйл ажиллагааг төрийн хатуу хяналтад авч, зөвхөн тусгай зөвшөөрлийн хүрээнд явуулах эрх зүйн зохицуулалтыг бий болгохоор тусгасан. Үүнээс гадна шинээр гарч ирж буй сэтгэцэд нөлөөт бодисуудыг шуурхай үндсэн жагсаалтад оруулж, тэдгээртэй холбоотой үйлдэлд эрүүгийн болон бусад хариуцлага тооцох эрх зүйн орчныг бүрдүүлэхээр тусгаад байна. Мөн хар тамхинд донтох эмгэгтэй хүмүүст авах арга хэмжээг илүү тодорхой болгож, тэднийг эмчлэх, сэтгэц болон бие махбодыг нь эрүүлжүүлэх чиглэлээр эрүүл мэндийн салбарт хийх ажлуудыг нэмэгдүүлэхээр төлөвлөсөн.

Одоогоор хүчин төгөлдөр мөрдөгдөж буй эрүүгийн болон зөрчлийн хариуцлагын зохицуулалтад тодорхой сул талууд бий. Жишээлбэл, Эрүүгийн хуульд хар тамхи, мансууруулах бодистой холбоотой таван төрлийн гэмт хэрэгт эрүүгийн хариуцлага тооцдог бол үүнээс цааш үйлдвэрлэх, тээвэрлэх, бусдыг хэрэглэхэд хүргэх зэрэг илүү ноцтой үр дагавартай үйлдлүүд нь эрүүгийн хариуцлагад бүрэн хамрагддаггүй, зөрчлийн хуулиар торгуулиад өнгөрөх тохиолдол байдаг. Тиймээс эдгээр ноцтой үйлдлийг эрүүгийн гэмт хэрэгт тооцож, хариуцлагыг чангатгах саналыг боловсруулж, хуулийн төсөлд тусгасан бөгөөд энэ дэмжигдлээ” гэсэн юм.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 12. ПҮРЭВ ГАРАГ. № 46 (7788)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn