Нийслэлийн төсвийн хөрөнгөөр хэрэгжиж буй автобус худалдан авах ажиллагаа дахин олон нийтийн анхаарлын төвд орлоо.

Улаанбаатар хотын нийтийн тээврийн автобус худалдан авалт сүүлийн жилүүдэд маргаан, хардлага, авлигын хэрэгтэй нэр холбогдож ирсэн. Тэр дундаа олон нийтийн анхаарлыг хамгийн их татсан “Ногоон автобус”-ны хэрэг эцэслэн шийдвэрлэгдээгүй байхад автобус худалдан авах шинэ тендерүүд дахин эргэлзээ дагуулж эхэллээ.

Энэ удаад Нийслэлийн Худалдан авах ажиллагааны газраас зарласан нийт 156 автобус худалдан авах олон улсын тендерийн 60 цахилгаан автобусны багцад БНХАУ-ын Yangzhou Yaxing Motor Coach Co., Ltd компанийн ASIASTAR брэнд шалгарсан байна.

Тендерийн үр дүнгийн мэдээллээс үзэхэд тус компани нийт 50,306,497,500 төгрөгийн үнийн санал ирүүлсэн бөгөөд нэг автобусны үнэ 838,441,625 төгрөг болж байна.

Тендерийн дэлгэрэнгүй: https://user.tender.gov.mn/mn/result/detail/1783512511176

Энэхүү тендерийн хамгийн их анхаарал татаж буй нэг асуудал нь ASIASTAR брэндийн Монгол дахь албан ёсны дистрибьютерээр ажиллаж буй Эм Эс И Ти энд Ди ХХК-тай холбоотой мэдээлэл юм.

Тус компанийн хувьцаа эзэмшигч Бямбадоржийн Цолмон нь өмнө нь олны анхаарлын төвд байсан “Ногоон автобус”-ны хэрэгт холбогдож байсан гэх мэдээлэл бий.

Мэдээж аливаа хэрэгт холбогдсон байх нь тухайн этгээдийг гэм буруутай гэж үзэх үндэслэл биш. Гэвч өмнөх автобус худалдан авалтын дуулиан бүрэн цэгцрээгүй байхад түүнтэй нэр холбогдож байсан этгээдийн хувьцаа эзэмшдэг компанийн төлөөлж буй брэнд нийслэлийн олон арван тэрбум төгрөгийн худалдан авалтад оролцож, шалгарсан нь олон нийтийн зүгээс эргэлзээ төрүүлж эхлээд байна.

www.asiastarbuses.com

Тендерийн гомдол болон Нийслэлийн удирдлагын байр суурь

Мөн уг тендертэй холбоотойгоор Моннис Моторс ХХК гомдол гаргасан гэх мэдээлэл байна. Тендерийн өрсөлдөөнд оролцогч компаниас гаргасан гомдол нь худалдан авах ажиллагааны хяналт, үнэлгээний үйл явцад хамаарах чухал асуудал юм.

Харин уг гомдолтой холбоотойгоор хотын удирдлагын зүгээс гаргасан гэх хариу үйлдэл, байр суурь ч олон нийтийн анхаарлыг татаж байна.

Тендерийн гомдлыг уур бухимдал, улс төрийн байр сууриар бус, хууль болон баримтад үндэслэн шийдвэрлэх ёстой. Төсвийн хөрөнгөөр хийгдэж буй худалдан авалтын хувьд оролцогч бүр тэгш боломжтой, үнэлгээний үйл явц нь ил тод, хөндлөнгийн хяналтад нээлттэй байх нь үндсэн шаардлага юм.

Хамгийн чухал нь ямар компани шалгарсан бэ гэдгээс гадна ямар шалгуураар, хэрхэн шалгарсан бэ гэдэг асуудал юм.

Өмнөх автобус худалдан авалтын дуулианаас сургамж авсан эсэх, энэ удаагийн тендерт хууль ёсны өрсөлдөөн хангагдсан эсэх, төсвийн хөрөнгө үр ашигтай зарцуулагдаж байгаа эсэхэд Нийслэлийн удирдлага болон холбогдох байгууллагууд олон нийтэд нээлттэй, баримтад суурилсан тайлбар өгөх шаардлагатай байна.

Улаанбаатарчууд дахин нэг автобусны дуулиан биш, чанартай автобус, ил тод худалдан авалт, хариуцлагатай нийтийн тээврийн тогтолцоог хүсэж байна.

https://www.facebook.com/share/p/1A2Dxfdfy4/