Өнөөдөр Төгрөг сумын төв хөл ихтэй байна. Шинэ эмнэлгийн нээлтийг зорьж хөдөө гадаанаас ирсэн ирсэн улс олон. Хөдөөгийн иргэдэд эмнэлгийн тусламж үйлчилгээг тав тухтай орчинд, цаг алдалгүй түргэн шуурхай үзүүлдэг байхад анхаарч сумдын эмнэлгийн барилгыг шинэчлэх, түргэн тусламжийн унаа, эмчилгээ, оношилгооны тоног төхөөрөмжийг сайжруулахад анхаарч тодорхой асуудлуудыг шийдвэрлэж ирсний нэг нь Төгрөгийн ЭМТ-ийн шинэ барилга.

Тус Эрүүл мэндийн төв таван багийн 2700 гаруй иргэнд эмнэлгийн тусламж үйлчилгээг үзүүлж, жилдээ давхардсан тоогоор 6000-7000 хүнд үзлэг хийж, 400 гаруй хүнийг хэвтүүлэн эмчилдэг. Гэвч 2006 онд ашиглалтад орсон эмнэлгийн хуучин барилгын чанар муудсан, засвар үйлчилгээ хийгээд ч олигтой засал авдаггүй, иргэд хэвтүүлж эмчлэхэд тохь тух муутай байна гэдэг асуудлыг байнга тавьж ирсэн. Тиймээс 15 ортой эмнэлгийн шинэ барилга барих асуудлыг УИХ-ын гишүүдийнхээ хамт хөөцөлдөж хөрөнгө 2,0 тэрбум төгрөгийг улсын төсөвт суулгуулснаар үзлэг, эмчилгээний болоод өвчтөний өрөөнүүд, ариун цэврийн өрөө, халуун хүйтэн устай төвийн эмнэлгээс дутахгүй хоёр давхар сайхан барилгатай болж нээлтийн туузыг нь хайчиллаа.

ЭМЯ-наас зориуд анхаарч эмчилгээ, оношилгооны сүүлийн үеийн тоног төхөөрөмжөөр хангасан тул шинжилгээ хийлгэх гэж төв яваад байхгүй амар болсныг эмч нар ч, иргэд ч ярьж байна.