ОХУ-аас Украинд явуулж байгаа  цэргийн тусгай ажиллагаанд оролцон байлдаж байгаа, цэрэг дайчдын эхнэрүүд юу бодож, юу мэдэрч, нөхрөө харахын тулд сайн дураараа фронтын ойролцоох районуудад очиж  байгаа талаар Lenta.ru хэвлэл сурвалжилсан байна.  

Тэдний нөхрүүд, ядарчихсан, сэтгэлзүйн дарамтад орчихсон үнэхээр сэтгэлзүйн тусламж хэрэгтэй болчихсон нь илт байсан гэж бүсгүйчүүд ярьжээ. Бүхий л эрчүүд эхнэртээ  өмнө нь хийж байсан ажил, гэр бүл, гэрийн хоолоо санаж байгаагаа ярьсан гэнэ. 

Эхнэрүүд фронтын ойролцоох бүсэд очих гэж ямар хэцүү бэрхийг туулсан, бөөн хүнд суртал, зам туршид бөөн бэрхшээл шалгуур туулан байж очсон тухайгаа Lenta.ru-гийн сурвалжлагчид ярьжээ. Ямар ч баталгаагүй урт зам,  байнгын айдас түгшүүр туулан байж очсон гэнэ.

“Нөхөртэйгөө уулзсанаас хойшхи сэтгэл хөдлөл мэдээжийн хэрэг хязгаараас давсан. Буцахдаа хоёулаа уйлсан” гэж орос эмэгтэйчүүдийн нэг ярьжээ.

Эрэгтэй хүн, ялангуяа олонхи нь нэг их юм яриад байдаггүй,  гэхдээ л тэд хэзээ ч өмнөх шигээ байхаа больсон гэдэг нь харагдаж байсан гэж нөгөө нь хэлсэн байна. “Тэнд буун дуу байнга сонсогдож, дэлбэрэлт болж байгаа нь өдөр шөнөгүй сонсогдож  байлаа. Хаа сайгүй эвдэрсэн байшин, шүүр шанага шиг болсон  хашаанууд байсан" гэж агентлагийн ярилцагч эмэгтэй хэлсэн байна.

Гэсэн хэдий ч эмэгтэйчүүд фронтын бүсэд баруун хойд цэргийн тойрогт үзсэн бүх зүйлээ үл харгалзан нөхрөө урамшуулж дэмжихийг хичээж зарим нь бүр гэртээ хийсэн хоол аваачиж байжээ. 

Эх сурвалж: Монголын Мэдээ Сонин

2023 оны арваннэгдүгээр сарын 03. Баасан. №168 (5896)