Нийслэлийн иргэдийн төлөөлөгчдийн хурлын Зөвлөлийн хуралдаанаар НИТХ-ын 2024 оны 24/29 дүгээр тогтоолд нэмэлт оруулах, авто зам ашигласны төлбөрийн зохицуулалтыг боловсронгуй болгох саналыг хэлэлцэж дэмжлээ.

Иргэд авто зам ашигласны төлбөрийг бүтэн жилээр төлдөг боловч эрх бүхий байгууллагын шийдвэрээр тодорхой хугацаанд замын хөдөлгөөнд оролцох эрх нь хязгаарлагддаг. Иймд долоо хоног бүрийн тогтмол дугаарын хязгаарлалтаас бусад тохиолдолд хөдөлгөөн хязгаарласан өдрийн тоотой хувь тэнцүүлэн дараа жилийн авто зам ашигласны төлбөрөөс хөнгөлөлт тооцох зохицуулалтыг тусгахаар санал гарчээ.

Мөн COP17 олон улсын хурал болон хичээлийн шинэ жилийн бэлтгэлтэй холбогдуулан хэрэгжүүлсэн тэгш, сондгой дугаарын түр зохицуулалтын улмаас 14 хоног хөдөлгөөнд оролцох боломж нь хязгаарлагдсан тээврийн хэрэгслүүдийг уг хөнгөлөлтийн тооцоонд хамруулах саналыг нэмж гаргаж, дэмжигдсэн байна.

Энэхүү санал нь иргэдийн замын хөдөлгөөнд оролцох боломж хязгаарлагдсан хугацааг харгалзан үзэж, авто зам ашигласны төлбөрийн зохицуулалтыг илүү тэгш, шударга болгоход чиглэж буй аж.