Засгийн газар өнгөрөгч оны аравдугаар сард “Эрдэнэс Тавантолгой” ХК-д онцгой дэглэм тогтоож, тус компанийн гүйцэтгэх захирал Б.Ганхуягийг баривчилснаар нийгэмд “Нүүрсний хулгай”-н дуулиан албан ёсоор эхэлсэн. Нүүрсний хулгайн хэрэгт холбогдоод байгаа “Эрдэнэс таван толгой” ХК-ийн гүйцэтгэх  захирал асан Б.Ганхуягийг цагдан хорьж хамаарал бүхий этгээдүүд, авлигын сүлжээнийхнийг нь баривчлан хорьж, авлигын мөнгөөр санхүүжүүлсэн, худалдаж авсан хаус хотхон, орон сууц, оффисуудыг нь битүүмжилж, өдгөө мөрдөн шалгах ажиллагааг үргэлжлүүлж байгаа. Ер нь нүүрсний хулгайн гол хүн нь Б.Ганхуяг болоод өнөөдөр цагдан хориигдож байгаа нь энэ.

Гэтэл тэрбээр шүүхийн урьдчилсан хэлэлцүүлэг дээр энэ хэрэгт би холбоотой юм бол УИХ-ын 76, Засгийн газрын гишүүд ч холбоотой гээд тэднийг араасаа чирнэ гэдгээ зоригтойгоор хэллээ. Түүний хэлж байгаагаар бол нүүрсний хулгайн хэрэгт парламентын 76 гишүүн, МАН-ын дарга, Ерөнхий сайд Л.Оюун-Эрдэнийг танхимын нь гишүүдтэй араасаа чирэх бололтой. Тэгээд ч  зогсохгүй хил, гаалийнхан ч хоцрохгүй шүүхийн гадаа жагсах болох нь. 

Б.Ганхуяг “Бид энд золиослогдоод тэд тэнд засагтайгаа, тамгатайгаа, төртэйгээ үлдэж болохгүй. Надтай ойр байсных нь төлөө энд суулгаж байгаа бол бүгдийг нь аваад ир. 76-уулаа сууя энд. Нууц гэрээ, нүүрсний тээвэр, хил, гаалийнхыг бүгдийг АТГ-т  хэлсэн, одоо хаана байна.

ЭЗХ-ийн сайд Ч.Хүрэлбаатар өнөөдөр БНСУ-д орд зарсныхаа хариуд явуулсан мөнгөө над дээр бичээд явах юм уу, тэгвэл бүгдийг нь бичээд аваад ир. Эцэггүй хүүхдүүдийн нэрийг над дээр бас биччих. Тухайн үед 68 хүн баригдсан атал одоо би ганцаараа байна. Намайг гаргах юм бол маш олон хүний зүрх нь зогсох гээд байгаа” гэсэн байна. 

Энэ бүхнээс үзэхэд МАН-ын эрх баригчид олонхиороо төр засгийн эрхэнд  байгаадаа найдан аль өнгөрсөн өвлөөс эхэлсэн нүүрсний хулгай хэргийг чимээгүйхэн өнгөрөөгөөд энэ асуудлаарх парламентын хэлэлцүүлгийг эхлээд өнгө­рөгч дөрөвдүгээр сард хийнэ гэж байснаа дахин хойш­луу­даад одоо ирэх арван нэгдүгээр сард хийнэ хэмээн хойш нь татаж доош нь малтаад байгаа нь учиртай.

Өнөөгийн парламент, Засгийн газар, ер нь үе үед эрх мэдэлд байсан МАН-ынхнаас  энэ нүүрсний хулгайд холбогдсон хүмүүсийг нэрлэхээсээ холбогдоогүй ганц нэг хүн байвал нэр дурдах нь арай амар гэдэг нь олон зүйлээс харагдаад байгаа.

УИХ-ын дэд дарга байсан Т.Аюурсайхан бас нэгэнтээ “Намайг шоронд хийвэл би МАН-ын бүх булайг дэлгэнэ” хэмээж байлаа. 

Тэгэхээр нүүрсний хулгай гэдэг нь өнөөгийн МАН-ын эрх баригчдын хэлээд байгаа шиг зүгээр л хэдэн тээврийн жолооч, дунд тушаалын албан хаагч, хил гаалийн хэдэн хүний хэрэг биш бүүр дээрээс МАН-ын удирдах зөвлөлөөс, парламент, Засгийн газраар дамжуулан шидсэн том чулуу байх магадлал маш өндөр байна. 

Тэндээс ирсэн тушаал зааврыг биелүүлж байснаараа Т.Аюурсайхан, Б.Ганхуяг нар их зоригтой дуугарч байна. Т.Аюурсайханы хувьд бас их учиртай. “Намайг шоронд хийвэл” гэж байгаа нь учир шалтгааны үүднээс тунгаавал “Намайг шоронд хийхгүй бол би энэ бүхнийг задлахгүй” гэсэн утга илэрхийлээд байна. 

Харин Б.Ганхуяг нь ямар нэг болзол, барьцаагүйгээр “Ту­хайн үед 68 хүн баригдсан атал одоо би ганцаараа бай­на. Намайг гаргах юм бол маш олон хүний зүрх нь зог­сох гээд байгаа” гэж хэлж байна. 

Энэ бүхнээс үзэхэд МАН төр засгийн эрхийг дангаараа барьж байгаа болохоор АТГ, проку­рор, шүүх, магадгүй өм­гөө­лөгч­дийг ч бүгдийг нь командалж чадаж байна гэсэн үг. 

Одоо шүүхээс ял өгчихвөл Т.Аюур­сайхан юу гэхийг сон­сох, Б.Ганхуяг өнөөдөр хэл­сэн энэ үгэндээ хэрхэн хүрч шүгэл үлээхийг харах л үлдлээ. 

Тэгээд  МАН-ын дарга, Ерөнхий сайд Л.Оюун-Эрдэнэ авлига, хулгайтай тэмцэхээр зарласан таван “Ш” ажил­лагааныхаа ШҮГЭЛ ажил­лагааны хү­рээнд Б.Ганхуягийн исгэрэх шүгэ­лийг хэрхэн хүлээж авах бол гэдэг л байна. Тэр­бээр уг нь “Авлига хулгайтай тэм­цэнэ гэдэг бол намын нөхөдтэйгээ тэмцэнэ гэсэн үг” гэж нэг удаа хэлсэн л юмсан.

Эх сурвалж: Монголын мэдээ сонин

2023 оны есдүгээр сарын 13. Лхагва. №145 (5873)