ТЭР ЭРГЭЖ ИРНЭ
Монгол Улсын Ерөнхийлөгч Халтмаагийн Баттулга өнөөдөр ард түмнээрээ үдүүлэн, хүндэтгэлтэйгээр төрийн тэргүүний тамгаа дараагийн хүндээ хүлээлгэн өгөх гэж байна. Монголчууд бид аливаад уйдамхайдаа ч тэр үү, алив улстөрчийг албан тушаалаа өгөхөд нь бүү хэл албаа аваад удаагүй байхаас нь шүүмжилж эхэлдэг зуршилтай.
Харин энэ удаа Халтмаагийн Баттулга хамгийн өндөр рейтинг, нэр хүндтэйгээр, олон түмэндээ хүндлэгдсээр албаа шилжүүлэн өгч байна.
Судалгааны байгууллагуудын энэ сард явуулсан санал асуулгаар тэр өнөөдөр хамгийн өндөр оноо авсан хэвээр байна. Өнгөрсөн өвөл хаврын турш харийн гүрний тэргүүнийг дууриан зураг хөргөө авхуулан олон нийтийн сүлжээгээр цацаж, ард түмний хөрөнгөөр бүх аймаг орон нутаг дамжин олон нийтэд өөрийгөө магтан, телевиз бүрээр өөрийгөө сурталчилсан У.Хүрэлсүх ч өнгөрөгч 2020 оноос хойш тогтмол уруудаж байсан нэр хүндээ өсгөөд өсгөөд түүний энд хүрсэнгүй.
Чухамдаа Х.Баттулга ерөнхийлөгч бүр олон жилийн өмнөөс УИХ-ын гишүүн, сайд байхаасаа л ярьсан “Үндэсний үзэлд суурилсан аж үйлдвэржих бодлого“-оо бодит зүйл, биелэх үндэслэлтэй тодорхойлж, хэрэгжүүлж болохыг энэ хугацаанд харуулснаараа тэр олон түмнийхээ дунд хүндлэгдэж байгаа нь энэ. Ганцхан жишээ хэлэхэд л тэр Засгийн газрын гишүүн, сайд байхдаа л “Төмөр замын талаар төрөөс баримтлах бодлого” боловсруулан батлуулж, чухам үүгээрээ МАН-ын амтай бүхний бай болон өчнөөн жил шүүмжлүүлж, чичлүүлсэн ч шантралгүйгээр биелэх боломжтой, бодит ажил гэдгийг нь харуулж чадсанаараа ийн хүндэтгэл хүлээх бүрэн эрхтэй.
Эрх баригч МАН-ынхан хятадуудтай элбээд ч Улаанбаатар-Дарханы 210 км авто замыг тавьж амжаагүй байхад ерөнхийлөгчийн эхлүүлсэн Тавантолгой-Зүүнбаянгийн 416 км төмөр зам монголчуудын хүч хөдөөлмөрөөр ашиглалтад орж байх жишээтэй. Энэ замын ажлыг зураг төсөл зохиохоос эхлээд барьж байгуулах, туслан гүйцэтгэх гээд шат дамжлага бүрт нь монголчууд, зөвхөн монголчууд ажиллаж, ашиг орлоготой байсан билээ. Энэ зам дээр ажилласан цэрэг дайчид сая төгрөгийн цалин өвөртлөөд гэртээ харьсан.
Энэ төмөр зам ашиглалтад орсноор манай газрын хэвлий дэх баялаг дэлхийн зах зээлд дэлхийн жишиг үнээр хүрэх боломж нээгдэж байгаа юм. Энэ төмөр замыг дагаад жилээс жилд эзгүйрч байсан говь нутаг эзэндээ эргэн ирж, шинэ шинэ суурьшил үүсэн энэ орчмын олон орд газрыг ашиглах боломж нээгдлээ.
Чухамдаа энэ бүхэн бол түүний монгол хүн монголынхоо баялгийн эзэн байх ёстой гэдэг Х.Баттулгын үзлийн илэрхийлэл, иймдээ ч тэр энэ төмөр замын дагуух орд газруудыг монголчууд өөрсдөө эзэмшиж, өөрсдийн хүчээр дэлхийн зах зээлд гаргах боломжтой болно гэдгийг олоон жилийн өмнөөс олж харан бусдаар чичлүүлэн байж ажил болгож ашиглалтад оруулж байгаа нь энэ.
Дэлхий дахиныг айлган чичрүүлж, хөл хорио хязгаарлалт хийхээс аргагүй болон, улс гүрнүүд хилээ хааж арилжаа наймаа хийж, ажил үйлчилгээ явуулдаг айл өрх, хүмүүсийн халаас нимгэрээд ирэхийн цагт хүн ардынхаа амжиргааг дэмжих санаачилгыг Х.Баттулга л анх гаргасан. Тэтгэврийн зээлтэй ахмадуудын өрийг тэглэх, иргэн бүрт нэг сая төгрөг олгох гээд түүний олон санаачилгыг эрх баригчид жадлан эсэргүүцэж эхэлснээ үнэнд гүйцэгдээд ирэхээрээ эцэст нь аргагүйн эрхэнд нэр хаягийг нь өөрчлөн, тоо хэмжээг нь багасган олгож байгаа ч олон нийт түүнд л талархсаар байгаа.
Х.Баттулга бүрэн эрхийнхээ хугацаанд хаа холын АНУ, хаяа зэргэлдээ ОХУ -тай иж бүрэн стратегийн түншлэлийни хаирлцаа тогтоон, БНХАУ- тай найрсаг түншлэлээ улам бататгав. Тэр энэ жилүүдэд дэлхийн энтэй улстөрч, дипломатч гэдгээ харуулж Сибирийн тайга шатаж байхад АНУ-ын ерөнхийлөгч Дональд Трампад “Та Путин рүү нэг яриач. Дэлхийн уушги шатаж байна шүү дээ” гэж хэлж тэр дор нь утасдуулж чадсан. Ерөнхийлөгч болохдоо “Хятадын эсрэг хүн ерөнхийлөгч боллоо” гэлгүүлж байсан тэр цар тахлыг эхлүүлсэн хэмээн хүн бүр хятадыг зүхэж байхад өмнөд хөршдөө айлчилж 30 мянган хонь бэлэглэн БНХАУ -ын дарга Ши Жиньпинээр “Дуслын төдий ачлал үзүүлвээс дундрашгүй булаг мэт хариу барья уу” хэмээн хэлүүлсэн юм. Үнэхээр тэр дэлхийн том гүрнүүдийн тэргүүнтэй эн тэнцүү харьцаж чадсан дипломатч байлаа.
Х.Баттулга үзэл бодол, үйл ажлаараа үнэхээр олон түмний хүндэтгэл хүлээсэн улстөрч гэдгээ өнгөрсөн хугацаанд харуулж чадсан. Иймдээ ч тэр төрийн тэргүүний сэнтийг хамгийн өндөр нэр хүндтэйгээр орхиж байна. Түүний эсрэг бүхэл бүтэн улстөрийн нэг том нам бүтэн жил, бүр дөрвөн жил бодлого, үйл ажиллагаагаа чиглүүлэн улайран ажилласан гэж болно. Энэ л улс орон, ард түмний төлөө санаачилсан, эхлүүлсэн ажил үйл бүхнийг нь харлуулан гутаах, ажил хэрэг болгуулахгүй, олон нийтэд хүргэхгүй, зөв ойлгуулахгүйн төлөө парламент нь хууль гарган, Засгийн газрын бодлого болгон эсэргүүцэхийн зэрэгцээ, хэвлэл мэдээлэл, олон нийтийн сүлжээний суртал ухуулгын баг бүрэлдхүүн гээд бүхий л хэрэгслээ ашиглан ёстой төрөл бүрийн аргаар оролдсон ч монголчуудын хэлдгээр ёстой “даравч дардайж, булавч бултайж” өнөө хүрсэн улстөрч байв.
Х.Баттулгыг төрийн тэргүүнээр дахин сонгуулахгүйн төлөө зөвхөн үүнд л зориулсан хууль гаргаад зогссонгүй, түүнийг улс төрд эргүүлэн оруулахгүйн төлөө дахиад бас хууль санаачилж хүртэл сууцгаана. Үнэхээр МАН гэдэг улс төрийн энэ хүчнийг бүхэлд нь хөдөлгөж, тэд түүнээс айн чичирч байна.
Ингэлээ гээд Халтмаагийн Баттулга шантрахгүй гэдгийг олон түмэн мэдэж байгаа. Тиймдээ ч түүнийг улс төрд эргэн ирнэ гэдэг бүрэн итгэлтэй хүлээж байна. УИХ-ын гишүүн, Засгийн газрын гишүүн, сайд, Монгол Улсын Ерөнхийлөгч гээд монгол төрд зүтгэсэн он жилүүддээ тэрбээр энэ байтугайгаар хэлүүлж байсан ч шантраагүй, бодож санасан, эхлүүлсэн ажлаа орхиогүй, орхих ч үгүй.
Ийм ч болохоороо тэр монголын улс төрд өөрийн гэсэн орон зайтай, олон түмнээс хүндэтгэл хүлээсэн, улстөрдөө эргэн ирээсэй гэсэн хүлээлттэй улс төрч. Түүнээс монголын ард түмэн, дахин өөр шинэ сум, өөр шинэ төмөр зам өөр өөр шинэ бүтээн байгуулалтууд хүсч, хүлээж байгаа.
Тэр монголын улс төрд эргэж ирнэ...Орон зай, хийж бүтээх ажлууд нь, олон нийт хүлээж байгаа.
#МонголынМэдээСонин 2021 оны зургадугаар сарын 28. Даваа. №085 (5490)
#ҮзэлБодол
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
