Их Британийн нийслэл Лондон хотын төв хэсэгт байрлах  парламентын ордны ойролцоо Уэстминстерийн гүүрэн дээр гурван хүн террорист халдлагад өртөж амиа алджээ. Орон нутгийн цагаар лхагва гарагийн үдээс хойш 15.00  цагийн үед Уэстминстерийн гүүрэн дээгүүр явж байсан явган зорчигчдыг автомашинтай нэгэн этгээд дайран явжээ.

 

Тэрбээр машинаасаа бууж ирээд, Лондон хотын төвд орших парламентын ордны гадна үүрэг гүйцэтгэж байсан цагдаагийн офицерыг хутгалан хөнөөсөн байна. Цагдаа нарын мэдэгдсэнээр, халдлагын үеэр гурван хүн амиа алдаж, наад зах нь 40 хүн гэмтэж бэртсэний дотор гурван франц сурагч болон Румыны хоёр иргэн байгаа аж. Гэмт этгээдийг цагдаа нар хэргийн газарт буудан устгажээ.  Чухам ямар шалтгааны улмаас ийм халдлага үйлдэх болсныг олж тогтоохоор цагдаа нар ажиллаж буй бөгөөд хамгийн сүүлд авсан мэдээллээр хэрэгт холбогдуулан есөн хүнийг баривчилсан байна.

 

Мөн энэ үйл явдалтай давхцан өөр нэг хотод дахин хоёр хүн амиа алдаж, 29 хүн эмнэлэгт хүргэгдсэн тухай сэтгүүлчдэд мэдээлсэн байх бөгөөд  хоёр удаагийн халдлагыг нэг хүн үйлдсэн хэмээн үзэж буй аж.  Хуулийн байгууллагынхан террорист этгээдийг лалын хэт даврагч аль нэг бүлэглэлтэй холбоотой эсвэл хэт даврагчдын үзэл сурталд автсан байж болзошгүй гэж таамаглаж байгаа юм байна. 

 

Гэнэтийн террорист халдлага гарч олон хүн амь нас, эрүүл мэндээрээ хохирсонтой холбоотойгоор цагдаагийн ажилтнууд орон даяар зургаан газарт нэгжлэг хийж, нийтдээ найман хүнийг баривчилжээ. Нөгөөтэйгүүр, орон нутгийн зарим хэвлэлд хэрэгтэн өмнөд ази гаралтай, аль нэг бүлэглэлд харьяалагддаггүй тухай мэдээлсэн байгаа юм. Их Британийн Ерөнхий сайд Тереса Мэй энэ удаагийн халдлагыг “Бузар террорист халдлага” хэмээн хурцаар шүүмжилсэн бол цагдаагийн холбогдох албан тушаалтан “Терроризмын эсрэг хэлтсийнхэн  мөрдөн байцаалт явуулж байгаа” гэдгийг тодотгожээ. Уэстминстерийн гүүр парламентын ордон болон Бигбэний цагтай ойр байрладаг тул тухайн хэсэг жуулчдын олноор зорин очдог газрын нэг юм. 

 

Хэрэг гарсантай холбоотойгоор мөн өдрийн шөнө Ерөнхий сайд Тереса Мэй онц яаралтай хурал зарлаж, үүний эсрэг авах арга хэмжээний талаар хэлэлцжээ. Террорист халдлагад өртөж байсан улс орнуудын удирдагчид, тэдний дотор Францын Ерөнхийлөгч Франсуа Олланд болон Германы Канцлер Ангела Меркель нар Их Британийн ард түмэнд гүн эмгэнэл илэрхийлэхийн сацуу тэднийг дэмжиж байгаагаа мэдэгдлээ. Тэрбээр  “терроризм бид бүхний сэтгэлийг хамгийн их түгшээсэн асуудал болоод байна. Британичууд яаж зовж шаналж байгааг францчууд бид бүхэн сайн мэдэж байна” гэжээ.  

 

Өнгөрсөн оны долдугаар сард Францын өмнөд нутгийн Ницца хотод ачааны машинтай этгээд явган зорчигчид руу дайрч, 84 хүний аминд хүрсэн билээ. Уг халдлагын хариуцлагыг “Лалын улс” бүлэглэл өөртөө хүлээсэн юм. Германы Канцлер А.Меркель мөн  Их Британийн ард түмэнтэй сэтгэлээрээ хамт байгаа гэдгээ илэрхийлсэн байна. Тус улсын нийслэл Берлин хотод өнгөрсөн оны арванхоёрдугаар сард Зул сарын баярын яармаг худалдааны үеэр  мөн ачааны машинтай этгээд  12 хүний аминд хүрсэн билээ.