Жил бүрийн гуравдугаар сарын 08-нд дэлхийн олон улс оронд Олон улсын эмэгтэйчүүдийн эрхийг хамгаалах өдрийг тэмдэглэдэг. Энэ өдрийг дэлхийн өнцөг булан бүрт өргөн дэлгэр тэмдэглэж байгаа. Түүх сөхвөл 100 гаруй жилийн өмнө анх удаа олон улсын эмэгтэйчүүдийн эрхийг хамгаалах өдрийг зарлаж байжээ. Дараа нь энэ өдрийг цагаач эмэгтэйчүүд өөрсдийн эрх ашгийг хамгаалах өдөр болгосон гэдэг. Тэр цагаас өнөөдрийг хүртэл эмэгтэйчүүд энэ өдөр жагсаал цуглаан зохион байгуулж, ажил хаялт зарлаж, эрхээ хамгаалан тэмцэх өдөр болгон тэмдэглэсээр ирсэн байна.

Энэ өдрийг эрчүүд хайртай ээжийгээ, халамжит ханиа, хөөрхөн охиноо, ангийн найзаа, хамт ажиллагсдаа баярлуулах өдөр болгон тэмдэглэж, баярын бялуу хувааж энд тэндгүй архи, дарс задлан бүх нийтээрээ амардаг. Энэ өдрийн утга агуулгыг бид жинхэнэ утгаар нь алдагдуулан тэмдэглэдэг гээд хэлчихэд хилсдэхгүй.

Уг нь олон улсад тэмдэглэдэгчлэн энэ өдөр Монгол бүсгүйчүүдийн эрхийн тухай ярилцах ёстой өдөр юм. Монгол эмэгтэйчүүд бусад оронтой харьцуулахад харьцангуй эрх чөлөөтэй. Гэвч асуудал байсаар байна.

Сүүлийн үед хамгийн хурцаар яригдах ёстой асуудлын нэг нь үр хөндөлт. Уг нь үр хөндөлтийг бүсгүйн биед хийж байгаа боловч хариуцлага нь эр, эм хоёр хүнд хамтад нь ногдох ёстой асуудал. Үр хөндүүлсэн эмэгтэйчүүдийн бараг ихэнх хувь нь анхны үр хөндөлт байгаа нь харамсалтай. Нэн ялангуяа өсвөр насны охид олноороо үр хөндүүлдэг болоод байгаа нь нууц биш. Түүнчлэн бэлгийн хүчирхийлэл, гэр бүлийн хүчирхийлэлд өртөх болсон эмэгтэйчүүдийн тоо жил ирэх тусам өссөөр байгаад анхаарал хандуулах цаг хэдийнээ болсон. Эргэн сануулахад, Төв аймгийн Баянчандмань суманд ноцтой хэрэг гарч байсан.

Тодруулбал, тус сумын нөлөө бүхий хариуцлагатай албан тушаалтнууд 25 настай Б бүсгүйг зэрлэгээр хүчирхийлж, хөдөө хээр аваачин орхисон хэрэг гарч байлаа. Мөн 21-хэн настай охин найз залуугийнхаа гарт 48 цаг зодуулж, дотор эрхтэнээс нь ганц ч эрүүл эрхтэн үлдээгүй, бүгд няцарсан байсан гэх хэрэг гээд үнэхээр нийгмийг цочирдуулсан олон хэрэг ар араасаа гарсаар байгаа.

Эмэгтэйчүүдийн эрх бусдаас үүдэн ийнхүү хохирч байгаагаас гадна өөрсдөөсөө шалтгаалах эрхээ эдэлж чадахгүй байгаа олон асуудал байна. Тухайлбал, сүүлийн жилүүдэд эмэгтэйчүүд эрчүүдээс илүүтэйгээр архийг хэтрүүлэн хэрэглэдэг дадалтай болоод байгаа талаар мэргэжилтнүүд ярих болсон. Тиймээс эмэгтэйчүүдийн эрхийг хамгаалах олон улсын энэхүү өдрөөр архигүй тэмдэглэх уриалгыг улс орон даяар өрнүүлсэн ч яадаг юм. Харин наргиан цэнгээнээр өнгөрөөлгүй, өөрсдөд нь тулгамдаад байгаа асуудлуудыг шийдвэрлэх шатны байгууллагын төвшинд яриад, ганц өдөр дорвитой арга хэмжээ зохион байгуулж яагаад болохгүй гэж.

Эмэгтэйчүүд нэгдэхээрээ ямар хүчтэй байдгийг харуулмаар байна. Эрчүүд маань эмэгтэйчүүдээ хайрлаж явдгаа, мөн тэдний хайранд талархаж буйгаа энэ өдөр илэрхийлдэг. Тиймээс эрчүүдийнхээ хайранд умбаж, баярлаж, цэнгэхийн зэрэгцээ эрхийн асуудлаа шийдвэрлүүлэх шаардлагатай байна.

Ингээд монголынхоо хацар гоо охид, хатан заяат ижий нартаа олон улсын эмэгтэйчүүдийн эрхийг хамгаалах өдрийн гал цогтой мэндийг хүргэе. Сайхан баярлаарай бүсгүйчүүд ээ.