Засгийн газрын ээлжит хуралдаанаар “Оюутан-Цэрэг”-т цэргийн мэргэжил олгох сургалтын журмыг баталлаа.

Тус журмаар цэргийн сургуулиас бусад их, дээд сургууль, коллежийн эрэгтэй оюутан, политехник, коллеж, мэргэжлийн сургалт, үйлдвэрлэлийн төвийн эрэгтэй суралцагч суралцаж байх хугацаандаа цэргийн мэргэжил олгох, цэргийн нэгдүгээр зэргийн бэлтгэл үүрэгтнээр бүртгэгдэх харилцааг зохицуулах юм байна.

Энэхүү сургалтад магадлан итгэмжлэгдсэн их, дээд сургууль, коллежийн нэгдүгээр дамжааны оюутан, политехник коллеж, Мэргэжлийн сургалт, үйлдвэрлэлийн төвийн суралцагч сайн дурын үндсэн дээр хамрагдах боломжтой аж. Харин сургалтад хамрагдах хүсэлтэй тухайн жилийн гуравдугаар сарын 10-ны дотор харьяа аймаг, нийслэл, дүүргийн Цэргийн штабт гаргаж, бүртгүүлэх гэнэ.

Мөн уг сургалтад хамрагдах оюутнуудад хэд хэдэн шалгуур тавих аж. Тухайлбал, оюутан, суралцагчийг сурлагын голч дүн 2.8-аас дээш, бие бялдрын хөгжлийн төвшин, эрүүл мэндийн байдлыг шалгуур болгох юм байна.

Түүнчлэн хүсэлт гаргагч нь иргэний болон оюутны үнэмлэх, эрүүл мэндийн даатгалын дэвтэр, сургалтад хамрагдах сургуулийн зөвшөөрөл, тодорхойлолт, сурлагын дүнгийн хүснэгт, суралцахыг хүссэн өргөдлөө бичих ажээ.