Манай орны нийт нутгийн 70 орчим хувьд цасан бүрхүүл тогтсоны улмаас 15 аймгийн 110 сум, нийслэлийн нэг дүүрэгт өвөлжилт хүндрэх нөхцөл байдал үүсээд байна.

Тиймээс Монгол орны эдийн засгийн үндсэн суурь болсон мал аж ахуйн салбарт үүсч болох эрсдэлээс урьтаж, байгаль, цаг уурын онцгой хүндрэлийг хохирол багатай даван туулах зорилгоор “Малчдад туслах сайн санааны аян”-ыг төрийн болон төрийн бус байгууллагууд, оюутан залуус эхлүүлээд байгаа билээ.

Тэгвэл Монголын Үндэсний их сургуулийн Аялал жуулчлал, газрын харилцааны сургуулийн Байгаль Ашиглалт Хяналт үнэлгээний дөрөвдүгээр дамжааны оюутнууд энэхүү аянд нэгджээ. Оюутнууд сайн санааны аяны хүрээнд малчдад  ажлын бээлий, шүдэнз, малын нэмнээ, чийдэн зэргийг цуглуулсан байна.

Аяны хүрээнд цуглуулсан зүйлсээ өнгөрсөн баасан гарагт ОБЕГ-ын Улсын нөөц хүмүүнлэгийн тусламжийн газарт хүлээлгэн өгчээ. Оюутнууд сайн санааны аянг үргэлжлүүлэх уриалга гаргасан байна.