АТГ-аас өчигдөр Ерөнхий сайд асан Н.Алтанхуягийг сэжигтнээр тооцож, зарлан дуудах хуудас хүргүүлсэн. Улмаар Ерөнхий сайд асан Н.Алтанхуяг АТГ дээр өчигдөр очиж, мэдүүлгээ өгсөн юм.

Тэрбээр мэдүүлэг өгөхөөр орохын өмнө сэтгүүлчдэд өгсөн ярилцлагадаа “Би Ерөнхийлөгчид нэр дэвшинэ гээд хэлчихсэн чинь нэлээд их үйл явдал өрнөх шинжтэй. Ер нь Ц.Элбэгдорж бид нар 1990 оноос ардчиллын төлөө явсан.  Ц.Элбэгдоржийн үгэнд заавал орох ёстой. Хэрэв Ц.Элбэгдоржийн үгэнд орохгүй бол шоронд ордог ийм ардчиллын төлөө би яваагүй. Ийм хоёрхон сонголттой ардчилал Монголд байж болохгүй, ард түмэн минь. Ер нь бол би Ц.Элбэгдоржийн үгэнд ормооргүй байна. Харин улс орныхоо төлөө зүтгэмээр байна. Шоронд хийсэн ч гэсэн бууж өгөхгүй тэмцэнэ” гэдгээ дуулгасан.

Өөрөөр хэлбэл, Ц.Элбэгдорж түүнийг Ерөнхийлөгчид нэр дэвшүүлэхгүй байлгах гэж энэ бүх баривчилгааг зохион байгуулж байна гэдгээ тэр шуудхан хэлсэн. Тэгвэл Н.Алтанхуягийг асуудлаар өчигдөр АН-ын Гүйцэтгэх зөвлөл “Шонхор тауэр”-т яаралтай хуралдсан юм. Эх сурвалжуудын мэдээлж буйгаар өчигдрийн хурлаар Ерөнхий сайд асан Н.Алтанхуягийг  Ерөнхийлөгчид нэр дэвшүүлэхгүй байхаар ярилцсан гэнэ.

Түүнчлэн АН-ын Гүйцэтгэх зөвлөлийн гишүүд түүнийг холбогдуулан шалгаж байгаа хэргийн талаар нотлох баримтгүй, хэлмэгдүүлсэн гэдэг дээр нэгдсэн байр суурьтай байсан байна.

Дашрамд дуулгахад, Ерөнхий сайд асан Н.Алтанхуягийг хөрөнгөө нуун дарагдуулсан гэх үндэслэлээр АТГ-аас шалгаж байгаа тухай мэдээлэл газар аваад байгаа билээ. Энэ удаад түүнийг хорьж шалгах нь бараг тодорхой байгаа сурагтай байсан. Гэхдээ өчигдөр түүнээс байцаалт аваад явуулсан байна.