АҮЭБ-ийн дэд сайд Б.Энхтүвшин яамны хурлын зааланд цаг үеийн асуудлаар мэдээлэл хийлээ.

Тэрбээр "Дэлхийн хэмжээд үүсээд байгаа нөхцөл байдалтай холбоотойгоор манай улс шатахууны үнэд өөрчлөлт оруулахаар болсон. ОХУ-аас дөрөвдүгээр сард нийлүүлэх шатахууны хувьд АИ-92 бензиний үнийг тогтвортой хадгалах ч бусад төрлийн түлшний үнийг тодорхой хэмжээгээр нэмэх шийдвэр гаргасан. Үүнтэй холбоотойгоор Үнийн зөвлөлөөс АИ-92 шатахуунаас бусад төрлийн бүтээгдэхүүнийг литр тутамд 300-350 төгрөгөөр нэмэх зөвлөмжийг аж ахуйн нэгжүүдэд хүргүүлсэн. Цаашид зах зээлийн нөхцөл байдлаас шалтгаалан шатахууны үнэ литр тутамд 900-2000 төгрөгөөр нэмэгдүүлэх тооцооллыг хийж байгаа. Бидний хувьд шатахууны нийлүүлэлтийг төрөлжүүлэх гуравдагч орнууд, тэр дундаа БНХАУ-аас импортлох боломжийг судалж байна. Мөн ОХУ-ын тал Монгол Улсын шатахууны нийлүүлэлтийг тасалдуулахгүй гэдгээ илэрхийлсэн. Хаврын тариалалтын ажлыг дэмжих зорилгоор 10 мянган тонн түлшийг үнийн нэмэгдэлгүйгээр аж ахуйн нэгжүүдэд нийлүүлэхээр төлөвлөсөн. Мөн Засгийн газраас “Нефтийн бүтээгдэхүүний гаалийн албан татварыг тэглэх” УИХ-ын тогтоолын төслийг ойрын хугацаанд УИХ-аар батлагдвал шатахууны үнэ тав хүртэлх хувиар буурах боломжтой. Бидний хувьд 2026 оны эхний хоёр сард 518 мянган тонн газрын тосны бүтээгдэхүүн захиалж авсан. Харин гуравдугаар сард 181 мянган тонн нефть бүтээгдэхүүн захиалсан.

Өнөөдрийн байдлаар АИ-92 шатахуун 90.1 мянган тонн буюу 42 хоногийн нөөцтэй байна. АИ-95 шатахуун 6.4 мянган тонн буюу 72 хоногийн нөөцтэй байна. Харин дизель түлш 116 мянган тонн буюу 29 хоногийн нөөцтэй байна. Өчигдөр Үнэ, хангамжийн зөвлөлийг хуралдуулж, тодорхой зөвлөмжийг гаргасан. Үүнтэй холбогдуулан зарим мэдээллийг хүргэе. ОХУ-аас дөрөвдүгээр сард нийлүүлэх хил үнийг ирүүлсэн.

Энэ хүрээнд өмнө нь хийсэн тогтворжуулалтын гэрээгээр АИ-92 энгийн шатахууныг 705 ам.доллар хэвээр байгаа. Харин Евро-5 дизелийг тонн тутамд 1206 ам.доллар, АИ-95-ыг 1176 ам.доллар, АИ-98-ыг 1226 ам.доллар, энгийн дизель түлшийг 1385 ам.доллар, Евро дизелийг 1410 ам.доллароор тус тус тогтоосон" гэлээ.