Монголын хөлбөмбөгийн холбооны дотоод үйл ажиллагаа, төсөл хөтөлбөрийн санхүүжилтийг түр зогсоогоод байгаа аж. Олон улсын хөлбөмбөгийн холбоо, Азийн хөлбөмбөгийн холбооноос санхүүжилттэй байдаг Монголын хөлбөмбөгийн холбооны санхүүжилтийг тайланг хянахаар болсон байна. “Олон улсын хөлбөмбөгийн холбооноос шалгалт орж, аудитор томилогдон ажиллаж байна.

Олон улсын хөлбөмбөгийн холбооноос 950 мянган ам.доллар төсөвлөсөн ч аудит орж байгаа болохоор түр зогсоосон байгаа. Бусад санхүүжилтийг 4-р сарын аудитын дараа батална.” гэж Монголын хөлбөмбөгийн холбооны нарийн бичгийн дарга М.Ганбаатар хэллээ. Олон улсын хөлбөмбөгийн холбоо “FIFA Forward 1.0” буюу хөлбөмбөгийн хөгжлийг дэмжих төслийн хүрээнд Төв цэнгэлдэхийн хажуугийн стадионыг байгуулжээ.

Мөн Яармаг болон Төв аймагт байгуулсан хөлбөмбөгийн талбай зэрэг хөрөнгө оруулалтын тал дээр чиглэсэн санхүүжилт орсон. Иймээс энэ удаа Олон улсын хөлбөмбөгийн холбооноос шалгалт орж, аудитор томилогдон ажиллаж байна. Олон улсаас орж ирсэн санхүүжилтаас Монголын хөлбөмбөгийн холбооны дотоод үйл ажиллагаа, ажилчдын цалин гэх мэт урсгал зардлыг зарцуулдаг байна.