Цаг уур орчны шинжилгээний газраас өнгөрсөн амралтын өдрүүдэд эрс хүйтэрч ихэнх нутгаар цас орж цасан шуурга шуурах талаар онцгойлон анхааруулж байв. Тодруулбал, 31-нд баруун аймгуудын ихэнх нутаг, төвийн аймгуудын нутгийн баруун болон хойд хэсгээр, дөрөвдүгээр сарын 1-нд ихэнх нутгаар нойтон цас, цас орж, цасан шуурга шуурч,  эрс хүйтэрч, нутгийн өмнөд хэсгээр хүчтэй салхи, шороон шуургатай байна гэсэн юм. Тэгвэл цаг агаарын энэ үзэгдлээс болж нэг иргэн амиа алдсан бол нэг иргэн сураггүй алга болжээ. Тухайлбал, 

Баянхонгор аймгийн Богд сумын Луугар багийн “Элст хүрэм” гэдэг газар иргэн Б нь дөрөвдүгээр сарын 1-ний 21:00 цагт малчин Н-ийн гэрээс гарч Баянлиг сумын чиглэлд мотоциклоор зорчиж яваад сураггүй алга болжээ. Иймд Богд сум дахь Цагдаагийн хэсгийн алба хаагчид, Богд, Баянлиг сумын Засаг даргын Тамгын газрын ажилтнууд, ар гэрийнхэн иргэн Б /60 настай, эрэгтэй, сэтгэцийн эмгэгтэй/-ыг эрэн хайх ажиллагааг зохион байгуулсан байна. Улмаар дөрөвдүгээр сарын 2-нд  13:05 цагт Богд сумын Луугар багийн “Тарималын-Ам” гэдэг газар цогцсыг олж Цагдаагийн байгууллагад шилжүүлэн өгчээ. 

Мөн Өмнөговь аймгийн Даланзадгад сумын Баруунсайхан багийн Гурвансайхан хорооллын 7 дугаар гудамжинд Иргэн А дөрөвдүгээр сарын 1-ний 12:00 цагийн орчим гэрээсээ гараад сураггүй алга болжээ. Иймд тус аймгийн Онцгой байдлын газрын Эрэн хайх, аврах бүлэг, аймгийн цагдаагийн газрын алба хаагчид, ар гэрийнхэн иргэн А /50 настай, эрэгтэй, сэтгэцийн эмгэгтэй/-ыг гурван бүлэгт хуваагдан хайсан байна. Нэгдүгээр бүлэг Гурвансайхан хороололоос Морь барианы талбай хүртэл 20 км-т, Хоёрдугаар бүлэг Хөх толгойн-Ам гэдэг газраас Ханхонгорын гүүр гэдэг газар хүртэл 20 км-т, Гуравдугаар бүлэг Гурвансайхан уулын чиглэлд 10 км-т явганаар болон автомашинаар эрэн хайх ажиллагааг зохион байгуулсан боловч үр дүнд хүрээгүй тул 18:15 цагт түр зогсоожээ. 

Түүнчлэн их хэмжээний орсон цаснаас болж нэг айлын 150 орчим бог мал цасанд дарагдсан байна. Тус сум дахь Цагдаагийн хэсгийн төлөөлөгч, Адаацаг сумын Засаг даргын Тамгын газрын ажилтнууд очиж малчин Б-ын цасанд дарагдаж хорогдсон 150 бог малаас 65 бог мал /23 хонь, 42 ямаа/-ын сэг зэмийг татан гаргасан бөгөөд 85 бог малын сэг зэмийг өнөөдөр гаргаж цэвэрлэхээр болжээ.