Засгийн газрын шийдвэрээр өнгөрсөн тавдугаар сарын 1-нээс орон даяар Монгол Улсын бүх иргэнийг "Эрт илрүүлэг, урьдчилан сэргийлэх" үзлэг, оношилгоонд хамруулах ажлыг эхлүүлсэн. Өнөөдрийн байдлаар улсын хэмжээнд 600 мянга гаруй иргэн хамрагдаад байгаа бол Орхон аймагт  20 гаруй мянган иргэн эрт илрүүлэг үзлэг оношилгоонд хамрагдаад байна. Энэ нь улсын хэмжээнд эхний тавд орж байгаа үзүүлэлт болохыг ЭМЯ-наас Орхон аймагт ажиллаж буй албаныхан онцоллоо. 
     Тодруулбал, өнөөдөр ЭМЯ-ны Нийгмийн эрүүл мэндийн төвийн Халдварт бус өвчний хэлтсийн дарга Г.Ганхуяг  нарын албаныхан Орхон аймагт ажиллаж эрт, илрүүлгийн явц, хэрэгжилттэй  танилцаж, БОЭТ, Баян-Өндөр мед, Эрдэнэт медикаль эмнэлэгт ажиллаа. 
Мөн аймгийн Засаг даргын орлогч А.Түвшинжаргалтай уулзаж "Эрт илрүүлэг, урьдчилан сэргийлэх үзлэг, оношилгоо"-нд 18-34 насныхны хамрагдалтыг эрчимжүүлэх, зарим нэр төрлийн техник тоног төхөөрөмжийг нэмэгдүүлэх боломжтой эсэх талаар санал солилцсон юм. 

   Өнгөрсөн жилүүдэд урьдчилан сэргийлэх үзлэгт сайн дураар хамрагдах иргэдийн тоо улсын хэмжээнд 100 орчим мянга байдаг байсан бол орон даяар уг ажлыг өрнүүлснээр зургаан сарын хугацаанд 600 гаруй мянган иргэнээ хамруулж байгаа нь том үр дүн болохыг ЭМЯ-ны Нийгмийн эрүүл мэндийн төвийн Халдварт бус өвчний хэлтсийн дарга Г.Ганхуяг  хэлж байв. Мөн тэрээр, Орхон аймгийн удирдлагууд БОЭТ-д хөрөнгө оруулалтыг маш сайн хийж, сүүлийн үеийн техник тоног, төхөөрөмжөөр хангасны үр дүн нь "Эрт илрүүлэг, урьдчилан сэргийлэх" үзлэг, оношилгоонд хамрагдаж буй иргэдийн идэвх, оролцооноос харагдаж байгааг онцолсон.