“Ногоон-Эрдэнэт” хөтөлбөрийн хүрээнд Засаг дарга С.Батжаргал “Монголын Тандан судлаачдын холбоо” ТББ-тай хамтран Орхон аймгийн Хог хаягдлын менежментийг сайжруулах, сайн туршлагыг бий болгох, шинэ техник технологи инновацийг нутагшуулах ажлыг үе шаттайгаар хийж буй. Өнөөдөр Орхон МСҮТ-ийн нийтийн хоолны багш, оюутнуудын ажилд туршилт инноваци нэвтрүүлэх зорилгоор хүнсний гаралтай хог хаягдлыг боловсруулж, бордоо болгох машиныг “Монголын Тандан судлаачдын холбоо” ТББ-ын тэргүүн Б.Эрдэнээ гардуулан өглөө.

Нийтийн хоолны хичээлийн дадлагын явцад гал тогооноос гарсан яс, тос, шингэн зүйлсээс бусад бүх төрлийн 15 кг хүртэлх хүнсний хог хаягдлыг 12 цагийн дотор компостолж, 2.4 кг ургамлын бордоо болгох юм. Аймгийн Засаг даргын үндсэн чиглэлийн үйл ажиллагааны мөрийн хөтөлбөрт эко сургуулиудын тоог нэмэгдүүлэх зорилт тусгагдсан. Уг зорилтын хүрээнд Орхон МСҮТ нь эко сургууль болох зорилтыг дэвшүүлэн ажиллаж байгаа аймгийн тав дахь сургууль юм. Хүнсний гаралтай хог хаягдлыг боловсруулж гаргасан бордоогоор ногоон байгууламжаа нэмэгдүүлэх, оюутнуудыг шинэ техник технологид сургах, төгсөж гараад нийтийн хоолны салбарт ажиллахдаа тоног төхөөрөмжөө ажиллуулж сурсан байх дадлагыг бүрэн эзэмших гээд олон давуу талтайг тус МСҮТ-ийн захирал Х.Төгсбаяр онцлов.