Өмнөд Солонгосын анхны эмэгтэй Ерөнхийлөгч асан Пак Гын Хэ өдгөө 69 настай. Тэрээр төрөөс 118.5 тэрбум вон завшсан, авлига авсан, эрх мэдлээ урвуулан ашиглаж улсын нууц задалсан хэргээр 24 жилийн хорих ял сонссон юм. Экс ерөнхийлөгч 2017 оны 03-р сарын 31-ний өдрөөс хойш өнөөдрийг хүртэл 4 жил 8 сарын хугацаанд хоригдсон. Энэ хугацаанд шүүхэд давж заалдан өршөөл хүсээгүй юм. Гэвч сүүлийн саруудад түүний эрүүл мэндийн байдал эрс муудаж нурууны диск, мөрний үений үрэвсэл, шүдний эмчилгээ хийлгэхээр "Самсонг" эмнэлэгт удаа дараа хэвтсэн. Мөн сэтгэцийн өөрчлөлт ажиглагдаж эхэлсэн тул нарийн мэргэжлийн эмчийн үзлэг хийлгэж байжээ. Тэрээр шүүхээс ял сонссоныхоо дараа: "Бүх ачааг би үүрнэ... Итгэж явсан ойр дотны хүмүүсийн урвалтаас болж хамаг хичээл чармайлт талаар болсон... Гэхдээ би одоо тэр хүмүүсийг буруутгахгүй... Анх хамт улс төр эхлүүлсэн нөхөд бүх бурууг надад чихэхэд амьдрал ямар хатууг мэдэрч байсан..." гэж хэлсэн юм. Өмнөд Солонгосыг үсрэнгүй хөгжүүлсэн цуутай дарангуйлагчийн охин аавынхаа адил ерөнхийлөгчийн албан тушаалд хүрсэн. Түүний шоронгоос бичсэн ном 2021.12.31-ний өдөр нээлтээ хийнэ. Энэ ном олон учир шалтгааныг тайлах бололтой. Дуулиан дэгдэж нэгжлэг явагдахад гэрт нь орсон прокурор цагдаагийнхан гайхсан гэдэг. Ганц бие эмэгтэйд 1980-аад оны үеийн хуучин хөргөгч, тавилга гэх зүйл л байсан юм. Тэрээр бүх амьдралаа БНСУ-ын хөгжил дэвшил, зөв улс төрч байхад зориулсан байсаныг зарим нь хожим ухаарч, хямарч уйлсан гэгддэг. Экс ерөнхийлөгчийн ном "санагалзал хэн бүхэнд ирдэггүй" гэсэн нэртэй юм байна. Нэр дэвшсэн, удирдсан сонгууль бүрдээ ялалт байгуулсан түүнийг "сонгуулийн хатан хаан" гэж хочилдог байжээ. Аав ээж, гэр бүлээ залуу насандаа зүй бусаар алдан, амьдралын хамгийн их зовлон зүдгүүр үзсэн гэж түүнийг хэлдэг билээ.