Европ болон нийтийн хоолоор мэргэшиж, далайн гаралтай хоолны төрөлд олон улсын “CHINGIS KHAN CHAMPION CUP” тэмцээнээс алтан медаль хүртсэн “Быстро” рестораны ахлах тогооч Б.Баасанбямбатай ярилцлаа. Тэрээр хоббигоо мэргэжил болгож чадсан Эрдэнэтийн чадварлаг тогоочдын нэг юм.

• Ажлын гараагаа эхэлж байсан үеэс ярилцлагаа эхлэе?
• Би Эрдэнэт үйлдвэрийн ажилчдын хоолыг бэлтгэдэг “Монгол катеринг”-аас ажлын гараагаа эхэлж байлаа. Тухайн үед ерээд хүний бүрэлдэхүүнтэй маш том бааз байсан. Монгол катеринг нийтийн хоол хийдэг, хоолыг маш их хэмжээгээр хийдэг байсан тул тэндээс маш их зүйл сурч байсан.

• Тухайн үед Монгол катеринг өдрийн гурван ээлжээр үйлдвэрийн 6000 гаруй ажилчдын хоолыг хийдэг байсан санагдаж байна. Монгол катерингийн бааз задарснаас хойш тэдний ажилчдын ихэнх нь Маэстро, Быстрод хуваагдаад ажилд орсон байсан. Эдгээр газрууд чадвартай хүмүүсээ нэг дор цуглуулж, зөв газраас боловсон хүчнээ бүрдүүлсэн нь их таалагдсан.  Быстрод хэд дэх жилдээ ажиллаж байна?
• Монгол катерингаас гараад Быстрог нээгдсэнээс эхлээд  5 дахь жилдээ ажиллаж байна.
• Тогооч хүний хувьд ямар зарчим баримталдаг вэ?
• Ариун цэврээс эхлээд баримтлах зарчим их. Хоолонд нэг ширхэг үс орчихвий гэж халдвар, хамгааллаа ягштал баримталана.  Ажилдаа ирээд хамгийн түрүүнд дүрэмт хувцас малгайгаа өмсөхөөс миний ажил эхэлдэг.
• Эрдэнэтийн хоолны салбарын хөгжлийг ямар төвшинд байна гэж харж байна? Давуу тал юу байна?
• Ер нь их хөгжиж байгаа. Давуу тал гэвэл хоолны чиглэлээр үйл ажиллагаа явуулж байгаа ресторанууд багатай, энэ чиглэлийн зах зээл нээлттэй, боломж байгаа санагддаг.
• Эрдэнэтэд дутагдаж байгаа, хөгжих боломжтой хоолны ямар салбар байна?
• Нэлээд том, олон ажилтантай, багтаамж сайтай зэрэглэл өндөртэй ресторан байвал зүгээр юм болов уу гэж боддог. Манай Эрдэнэтэд ийм төрлийн ресторан ганц нэг л байгаа.

• Мэргэжлээрээ оролцож байсан уралдаан тэмцээн байгаа юу?
• Олон. Ганцаарчилсан төрлөөр Эрдэнэтэд хоёр удаа түрүүлж, Булган аймагт зохиогдсон хангайн бүсийн уралдаанаас хоёр мөнгөн медаль авч байсан. Түүнчлэн олон улсын “Chingis khan challenge cup” тэмцээнээс европ хоол болон загас, далайн бүтээгдэхүүний төрлөөр алт, мөнгөн медаль хүртсэн. Сүүлд 2019 онд болсон улсын аваргад багаараа оролцоод мөнгөн медаль авч байлаа.
• “Chingis khan challenge cup” тэмцээнд хэдэн хүн оролцож байсан бэ, шүүгчид хэрхэн үнэлж байв?
• Миний оролцсон төрөлд нийт 68 тогооч оролцсон. Шүүгчид хоолыг амталж өөр өөрсдийн үнэлгээг өгч нэгтгэсэн байдлаар дүгнэдэг учраас дүн гарсны эцэст л ямар үнэлгээтэйгээ мэдэх боломжтой байсан.
• Шинэ хоолны нэр төрлийг бий болгох тал дээр яаж ажилладаг вэ?
• Бид хоорондоо ярилцаж, туршиж үзээд шинэ цэсээ гаргадаг.
•  “Таны хоол сайхан байлаа” гэдэг үгийг, урмын мэдрэмжийг хэр их авдаг вэ? Тийм тохиолдлууд бий юу?
• Тийм мэдрэмжийг хоёр, гурван удаа авч байсан. Нэг удаа үйлчлүүлэгч дуудаад “Таны хоол маш амттай байлаа, баярлалаа” гэж хэлж хэлээд урамшуулж байсан. “Би гадаадад байхдаа ч ийм хоол идэж үзээгүй. Танайд ирж идлээ, маш их баярлалаа” гэж хэлэхэд урам их авч байлаа.
• Алдаа гаргасан үед өөрийгөө өмөөрдөг үү?
• Үгүй, би яагаад ийм алдаа гаргачихав аа л гэж боддог. Өөртөө гутранги маягийн хүлээж авдаг л даа. Ингэж болохгүй ш дээ, яагаад алдчихваа гэж л боддог. Цаашдын хийх зүйлдээ алдаагаа засч, илүү анхаарахыг хичээдэг.
• Хоол үйлдвэрлэлийн салбарын чиг хандлагын өөрчлөлтийг хэр соргог хүлээж авч, мэдэрдэг вэ? Үйлчлүүлэгчийн хооллолт, хоолны соёлын өөрчлөлтийг хараад нөхцөл байдлаа өөрчлөх тохиолдол хэр байна вэ?
• Үйлчлүүлэгчийн эрэлт хэрэгцээгээ дагаад хоолны цэсэнд байхгүй, уураг ихтэй фитнесс хоолыг захиалъя гэх мэт санал хүсэлтүүд зарим тохиолдолд орж ирдэг. Ийм тохиолдолд үйлчлүүлэгчийн санал хүсэлтэд тулгуурлаад шинэ төрлийн хоол гаргаж өгөх тохиолдол бий. Гэхдээ ихэнх тохиолдолд хоолны цэсний дагуу үйлчлүүлэгчид захиалгаа өгдөг.
• Хүнд өөрийн гэсэн ажил мэргэжил дээрээ хөгжих, амбицлах үе байдаг. Нэг ийм төрлийн хоол гаргах юмсан, ийм юм хийх юмсан гэсэн бодол байдаг уу?
• Байлгүй яах вэ. Ойрын үед хоолны цэсээ шинэчлэхээс эхлээд олон ажлууд төлөвлөсөн байгаа.
• Быстро, Маестро ресторан Эрдэнэтдээ хоолны салбарын жишиг тогтоосон газар бий болоход юу нөлөөлсөн гэж боддог вэ?
• Манай багш, мастер тогооч Б.Ганзориг нөлөөлсөн гэж боддог. Боловсон хүчнээ сайн бэлтгэж, зөв хүмүүсийг нэгтгэж чадсан, сайн удирдагч гэж боддог.
• Танай хоолны бусдаас ялгарах онцлог, давуу тал юу вэ?
• Нэгдүгээрт амт чанар, хоёрдугаарт төрөл зүйлээрээ ялгардаг. Манайх хоёр жил тутамд хоолны цэсээ сольдог. Одоогоор 20 гаруй нэр төрлийн хоолоор үйлчилж байгаа.
• Хоолны цэсээ боловсруулахдаа юуг анхаардаг вэ?
• Нэгдүгээрт бүтээгдэхүүний олдоцыг бодолцдог. Жишээлбэл, үхрийн мах гэхэд үхрийн махаар хийж болох амттай гоё хоолнуудыг бодолцож, өвчүүгээр нь шарсан өвчүү хийх шинэ төрлийн хачир бэлдэх зэргээр хоолны цэсээ сайжруулдаг.
• Өмнө нь далайн гаралтай хоолны төрөлд олон улсын уралдаанд түрүүлж байсан гэж байсан. Танай цэсэнд далайн гаралтай хоол байдаг уу? Энэ төрлийн хоолны чиглэл манай Эрдэнэтэд хэр нээлттэй салбар вэ?
• Манай цэсэнд нэг л байгаа, тэр нь загас. Манай Эрдэнэтийнхэн далайн гаралтай бүтээгдэхүүнүүдэд нэг их дуртай биш юм байна лээ. Оросууд л их сонирхдог.
• Цаашид ямар зорилго тавьж байна вэ?
• Эхний зорилго мастер болох. Доод тал нь 15 жил ажиллаж, шалгалт өгч байж мастер болдог. 
• Ярилцсанд баярлалаа.

                                                                                                                          Г.Оюунтуяа