"Өргөө" амаржих газарт төрсөн эх, нярайг ХӨСҮТ рүү шилжүүлэхдээ хүнлэг бус хандаж, дүрэм, журам зөрчсөн хүмүүс, холбогдох албан тушаалтнуудад хариуцлага тооцохыг иргэд шаардаж, жагслаа. Тэгвэл УОК, Засгийн газраас холбогдох албан тушаалтнуудад хариуцлага тооцох талаар хэлэлцжээ. Харин УОК-ын дарга Я.Содбаатар, Эрүүл мэндийн сайд Т.Мөнхсайхан албан тушаалаасаа огцрохоор болсноо мэдэгдэв. Энэ талаар УОК-ын дарга Я.Содбаатар "УОК-ын удирдлага огцорч байна. Өчигдөр болсон үйл явдалд гүнээ харамсаж байна. Нийт ард иргэдээсээ уучлалт хүсэж байна. Хариуцлагатай алба хариуцуулсан Ерөнхий сайд, нийт ард иргэдээсээ уучлалт хүсэж байна. Хариуцуулсан ажлыг чин сэтгэлээсээ гүйцэтгэлээ. Цар тахлыг дотооддоо 10 сар алдаагүй. Үүний таван сар нь шинэ Засгийн газрын ажил байлаа. Цар тахалтай тэмцсэн миний, манай багийн тэмцэлд стратегийн алдаа гараагүй гэдгийг хэлье. Бүх нийтийн цар тахал болоогүй. Тун удахгүй вакцин оруулж ирнэ. Шадар сайдын албанаас огцорч буй өргөдлөө Ерөнхий сайдад өгч байна" гэлээ. Мөн энэ үеэр Эрүүл мэндийн сайд Т.Мөнхсайхан "Ард иргэдээ цар тахлаас хамгаалах ажилд хоёргүй сэтгэлээр ажиллалаа. Бүхий л хүчээ дайчлан ажиллалаа. Эрүүл мэндийн сайдын хувьд албан үүргээсээ чөлөөлөгдөх хүсэлтээ уламжилна" гэсэн юм.