"Токио 2020" паралимпын наадамд Монгол Улсын баг тамирчид пара жүдо, таеквондо, байт харваа, буудлага, хөнгөн атлетик, хүндийг өргөлт гэсэн спортын зургаан төрөлд 11 тамирчин эх орноо төлөөлөн өрсөлдөж байна. Өнөөдөр буюу наймдугаар сарын 31-ний өдөр манай тамирчдын тэмцээн буудлагын төрлөөр үргэлжиллээ. Тодруулбал, Олон Улсын хэмжээний мастер Зандраагийн Ганбаатар 10 метрийн хийн гар бууны дасгалд өрсөлдөж, 26 тамирчнаас 16-т эрэмбэлэгдлээ. Тэрээр нийт 60 сумнаас 556 оноо авсан юм. Тамирчид зургаан үеийн турш нийт 60 сум тавьсан бөгөөд хамгийн өндөр оноотой найман тамирчин финалд шалгарсан.