Ковид19-ийн эсрэг вакцин хийлгэсэн иргэдийн халдварт өртсөн байдлын талаарх судалгааг Үндэсний статистикийн хорооноос хийжээ. 

Уг судалгаагаар коронавирусийн эсрэг дархлаажуулалтад хамрагдсан иргэдийн 35.5 хувь нь өвчилсөн болох нь тогтоогдсон байна. Харин нийт халдвар авсан иргэдийн 64.5 хувь нь огт вакцинд хамрагдаагүй байжээ.

2021 оны долдугаар сарын 5-ны байдлаар 15 ба түүнээс дээш насны хүн амын 81.4 хувь нь бүрэн тунд хамрагдсан байна. Үүнээс 73.9 хувь буюу 10 хүн тутмын 7 нь БНХАУ-ын VeroCell вакцин хийлгэжээ.

Нийт батлагдсан тохиолдлын 35.5 хувь нь Ковид19-ийн эсрэг аль нэг төрлийн вакцины нэгдүгээр болон бүрэн тунд хамрагдсаны дараа өвчилсөн байна.

Тодруулбал,

• нэгдүгээр тунд хамрагдсаны дараа 7.6 хувь нь,
• хоёрдугаар тунд хамрагдсаны дараа 27.9 хувь нь өвчилсөн байна.

Түүнчлэн Ковид19 халдварын эсрэг вакцинд хамрагдаад өвчилсөн иргэдийг бүрэн тунд хамрагдсанаас хойш өвчлөх хүртэл хоногоор авч үзсэн байна.

Тухайлбал тухайн вакцины бүрэн тунд хамрагдсанаас хойш 31 ба түүнээс дээш хоногийн дараа өвчилсөн иргэдийг авч үзвэл Спутник вакцин хийлгээд өвчилсөн иргэдийн 86 хувь нь хоёр тун хийлгээд 31 хоногоос дээш хугацаа өнгөрсний дараа халдвар авсан байна.

Мөн AstraZeneca вакцин хийлгэсэн иргэдийн 76.3 хувь, Covishield вакцин хийлгэсэн иргэдийн 75.6 хувь, Синофармын вакцин хийлгэсэн иргэдийн 56.8% нь хоёр тун хийлгээд 31 хоногоос дээш хугацаа өнгөрсний дараа халдвар авчээ. Харин Pfizer вакцин хийлгээд халдвар авсан иргэдийн 55.9 хувь нь 31-ээс доош хоногийн дараа халдвар авчээ.

Түүнчлэн цар тахлын улмаас нас барсан иргэдийн 60 гаруй хувь нь вакцинд хамрагдаагүй байна. Тодруулбал, 

• 61.6 хувь нь вакцинд хамрагдаагүй
• 20.7 хувь нь бүрэн тунд
• 17.6 хувь нь 1 дүгээр тунд хамрагдсан байна гэж Үндэсний статистикийн хорооноос мэдээллээ.