Хойд Солонгост суртал ухуулгын постер хулгайлсан гэх хэрэгт холбогдон 15 жил хүнд хөдөлмөр эрхлэх ял сонссон америк оюутан долоо хоногийн өмнө ухаангүй байдалтайгаар эх орондоо ирсэн билээ. Гэвч, ирснээсээ хойш ердөө зургаа хоногийн дараа таалал төгссөн байна. Жил гаруйн өмнө БНАСАУ-д баривчлагдсан 22 настай Отто Уармбьерыг эрүүл мэндийн шалтгааны улмаас суллаж, энэ сарын 13-нд  АНУ руу буцаасан байдаг. Тухайн үед талийгаач комд байсан бөгөөд АНУ-ын Охио мужийн Синсиннатигийн эмнэлэгт эмчилгээ хийлгэж байжээ. Тархиндаа ноцтой гэмтэл авч, хүмүүстэй харилцах боломжгүй болсон Отто төд удалгүй буюу даваа гарагийн 14:00 цагийн үед эцэг эхийнхээ гар дээр амьсгал хураасан байна.

Отто Уармбьер Виржиниагийн их сургуулийн оюутан байжээ. Гэвч өнгөрсөн оны нэгдүгээр сард Пхеньяны зочид буудлын өрөөнөөсөө улс төрийн суртал ухуулгын агуулгатай постерыг хулгайлсан гэх хэргээр нисэх онгоцны буудлаас баривчлагдаж, хүнд хөдөлмөр эрхлэх ял сонссон байдаг.  Хойд Солонгосын Засгийн газар болсон хэргийн талаар “талийгаачид өнгөрсөн жилийн гуравдугаар сард ял ногдуулсны дараа ботулизм өвчнөөр өвчилсөн. Тухайн үед нойрсуулах эм хэрэглэсний дараа комд орсон” гэж тайлбарлажээ. Гэвч “Хүүгийн минь биеийн байдал муу байгааг мэдсээр байж эмнэлгийн тусламж үзүүлээгүй” гэж Умард Солонгосын шоронгийн албаны хүмүүсийг О.Уормбиерын эцэг буруутгаж байна.

Тэгвэл одоогоор АНУ-ын зарим улстөрчид Пхеньянд хоригдож буй иргэдээ яаралтай суллахыг шаардаж эхэлсэн байна. Тухайлбал, Шинэ Мексик мужийн экс захирагч Билл Ричардсон талийгаачийг хоригдож байхад Хойд Солонгосын тусгай элч 20 удаа АНУ-ын албаныхантай уулзсан хэдий ч, нэг ч удаа биеийн байдал, эрүүл мэндийнх нь талаар дурьдаж байгаагүйг онцолжээ. Улмаар түүнд тохиолдсон шиг эмгэнэлт явдал одоо ч, Хойд Солонгост хоригдож буй Америкийн гурван иргэнд тохиолдож магадгүй тул суллахыг шаардаж эхэллээ.

Тодруулбал, Өмнөд Солонгост төрсөн АНУ-ын иргэншилтэй 62 настай Ким Дон Чул, профессор Тони Ким, Ким Хак Сон нар тус улсад ял эдэлж байгаа аж. Ким Дон Чулын тухайд тагнуулын хэргээр 2016 оны дөрөвдүгээр сард мөн л 10 жил хүнд хөдөлмөр эрхлэх ял сонсч байжээ. Харин Тони Ким буюу Ким Сан Дук профессор энэ оны дөрөвдүгээр сард баривчлагдсан. Гэхдээ түүнийг ямар үндэслэлээр саатуулсан нь одоогоор тодорхойгүй байгаа билээ.

Ким Хан Сонгийн хувьд Тони Кимийн адил Пхеньяны  их сургуульд ажиллаж байсан ч, төрийн эсрэг дайсагнасан үйл ажиллагаа явуулсан гэх үндэслэлээр нэг сарын өмнө баривчлагдсан юм. Болсон үйл явдалтай холбоотойгоор АНУ-ын Ерөнхийлөгч Доналд Трамп өөрийн байр сууриа илэрхийлээд амжжээ. Тэрбээр Хойд Солонгосыг “Харгис дэглэм”-тэй хэмээн буруутгасан байна. Мөн “Муу зүйл болжээ. Юу гэвэл Отто нас барсан байна. Цэл залуухнаараа хорвоог орхилоо.

Түүний гэр бүлийнхэнд гүн эмгэнэл илэрхийлье” хэмээн мэдэгдсэн байна.  Дашрамд дурьдахад, Хойд Солонгост АНУ-ын иргэдийг жуулчлан аялуулдаг “Young Pioneer Tours” байгууллага үйл ажиллагаагаа түр зогсоожээ. Тус компанийн төлөөлөгч “Ийм эмгэнэлт төгсгөлтэйгөөр Хойд Солонгост баривчлагдсан тохиолдол эдүгээг хүртэл гарч байгаагүй” гээд “Америкчууд Хойд Солонгост айлчлахад учрах эрсдэлийг тооцоход өндөр үзүүлэлттэй гарсан. Тиймээс америк иргэдэд зориулсан Хойд Солонгост хийх аялалын маршрутыг тодорхойгүй хугацаагаар цуцаллаа” хэмээн тайлбарласан байна.

БНХАУ-ын Шаньси мужийн Шьанд төвтэй “Young Pioneer Tours” байгууллагыг 2008 онд Их Британийн иргэн байгуулж байсан бөгөөд адал явдал хайгч жуулчдыг Хойд Солонгос, Иран гэх мэт “ээжтэйгээ хамт явж болохгүй” эрсдэлтэй газрууд руу аялуулдаг байна.