Аж үйлдвэр, эрдэс баялгийн сайд Г.Дамдинням бага оврын нефтийн бүтээгдэхүүн үйлдвэрлэх үйлдвэрийг бодлогоор дэмжинэ гэдгээ илэрхийлж, энэ чиглэлээр үйл ажиллагаа явуулж буй “Бадамлах гурван сайхан” ХХК-ийн төлөөллийг хүлээн авч уулзлаа.

Уулзалтын үеэр тус компанийн үүсгэн байгуулагч Г.Санчир компанийнхаа үйл ажиллагааг танилцуулж, нефтийн 20 гаруй төрлийн бүтээгдэхүүн үйлдвэрлэдэг бөгөөд тулгарч буй бэрхшээлээ уламжиллаа.

Сайд Г.Дамдинням дотоодын үйлдвэрлэлийг дэмжих бодлого баримталж буйг онцолж, шаардлагатай стандарт, журмын дагуу ажилласан тохиолдолд төрийн зүгээс дэмжиж ажиллахыг илэрхийлэв. Тэрбээр “Аливаа үйлдвэрлэл явуулахад техник, эдийн засгийн үндэслэл, стандарт, норм, шалгуур шаардлагыг мөрдөх нь чухал. Та бүхэн эхний ээлжид өргөдлөө өгч, холбогдох дүрэм журмын дагуу ажиллах хэрэгтэй.

Төрийн зүгээс иргэддээ аль болох хүндрэл учруулахгүйгээр зөвлөж, дэмжиж ажиллана. Нэг ч гэсэн Монгол компани үйлдвэр байгуулж, хөгжүүлэх нь чухал. Үүнийг бид бодлогоор дэмжинэ” хэмээн хэлэв.

Уулзалтын төгсгөлд “Бадамлах гурван сайхан” ХХК-ийн үүсгэн байгуулагч Г.Санчир “Монголчууд хийж чаддаг гэдгийг харуулахын тулд үйлдвэр байгуулсан. Таны гаргасан шийдвэрийг бид баяртайгаар хүлээн авсан” хэмээн талархлаа илэрхийлэв.