АНУ-ын Ерөнхийлөгч Доналд Трамп хууль бус цагаачдыг хил нэвтрүүлэхгүй байх зорилгоор Мексик-АНУ-ын хилд хана босгох тухай зарлигт гарын үсэг зурсан. Тэгвэл эл шийдвэрийг Мексикийн сөрөг хүчнээс эсэргүүцэж, энэ сарын 31-ний өдөр болох Ерөнхийлөгчийнхөө айлчлалыг бойкотлохыг оролджээ.

Мексикийн Ерөнхийлөгч  Энри́ке Пе́нья Нье́то энэ сарын 31-нд АНУ-д айлчлах юм. Тэгвэл сөрөг хүчнийхэн эл айлчлалыг цуцлахыг Засгийн газраас шаардах болсон байна. 2018 оны Ерөнхийлөгчийн сонгуульд нэр дэвших сөрөг хүчний нөлөө бүхий удирдагч ч “Үзэн ядалт, үл тэвшихийн илрэл юм. Бид хүлээн зөвшөөрч болохгүй” хэмээн хилд хана босгох шийдвэрийн талаар өөрийн твиттер хуудастаа бичжээ. Мөн Ерөнхийлөгч Пенья Ньетог дахин бодож үзэхийг уриалсан байна.

Одоогоор Мексикийн Ерөнхийлөгч Доналд Трампын хана босгох шийдвэрийн талаар албан ёсны байр сууриа илэрхийлээгүй байгаа. Гэхдээ АНУ-ын Ерөнхийлөгчийн сонгуулийн кампанитын үеэр буюу наймдугаар сард Д.Трампыг Мексикт урьж, ярилцаж байсан юм.