Баруун бүсийн тулгуур төв, олон ястны өлгий Ховд аймгийн ИТХ-ын Төлөөлөгч, Ажлын албаныхан Нийслэлийн ИТХ-ын үйл ажиллагаа, бүтэц зохион байгуулалт, бодлого, зорилттой танилцлаа. НИТХ-ын Захиргаа, удирдлагын хэлтсийн дарга М.Халтар зочдыг угтан авч НИТХ-ын бүтэц, үйл ажиллагааны чиглэл, Төлөөлөгчдийн танилцуулга, хурлын бүтэц, бүрэлдэхүүн, хамаарах асуудал, Ээлжит болон Ээлжит бус хуралдааны онцлог, Зөвлөл, хороодын ялгаатай байдал зэргийг танилцуулж, тодруулсан асуултад хариуллаа. 

Танилцуулга, мэдээллийн дараа НИТХ-ын дарга А.Баяр Төлөөлөгчдийг хүлээн авч НЗДТГ болон Засгийн газрын хэмжээнд хэрэгжүүлж буй бодлогын болон хөгжлийн төсөл, арга хэмжээний явц байдал, хэрэгжилтийн талаар мэдээлэл өгөв. 

НИТХ-ын дарга А.Баяр “Улаанбаатар хотыг хөгжүүлэх 24 мега төсөл хэрэгжүүлнэ. Түгжрэлийг бууруулахад чиглэсэн метро болон дүүжин тээврийн төслүүд гараанаас гарсан. Нэг төвт хотоос олон төвт хот болох зэхсэн төлөвлөгөөнүүд эхнээсээ биеллээ олоод “Сэлбэ” дэд төвийг түшиглэн гэр хорооллыг барилгажуулах том ажлын газар чөлөөлөлт 70 гаруй хувьтай явж байна. Энэ бол 20 минутын хотын загвар төв болно. Түгжрэлийг бууруулах чиглэлд Туулын хурдны зам, Шинэ тойрог зам төсөл хэрэгжүүлнэ.  Нийслэлийн авто замын сүлжээг өргөтгөж Туулын хурдны замыг барьснаар хотын зүүн буюу Баянзүрхийн товчооноос баруун аймаг руу салдаг аюулгүйн тойрог хүртэлх зургаан эгнээ 32 километр үргэлжлэх авто зам бий болох юм. Энэ мэт түүхэн ажлууд эхэлсэн, бүтээн байгуулалт хийсэн, ажил буцалсан цагаар эрхэм зочид ирж байгаад бэлгэшээж байна” гэлээ.

Ховд аймгийн ИТХ-ын дарга З.Эрхбаяр “Манай аймагт утаа, түгжрэл, газар чөлөөлөлт, хог хаягдлын менежмент, хот дахин төлөвлөлтийн асуудал тулгамдаад байна. Нийслэл болон Дархан, Орхон аймгууд энэ бэрхшээлээ хэрхэн шийдэж байгааг харах, Нутгийн өөрөө удирдах байгууллагын тогтоол, шийдвэрийн хэрэгжилт, биелэлт, хяналт тавих арга туршлагаас судлахаар зорьж ирлээ” гэдгийг онцоллоо. Тэрбээр “Ховд аймагт 24 мянган авто машин авто замын хөдөлгөөнд оролцож байна. Эртний хотын зам, дэд бүтэц, төлөвлөлт өнөөгийн төвлөрлийг даахгүй боллоо.

Тиймээс баруун бүсийн тулгуур төвийн төлөвлөлтийг дахин хийх хэрэгцээ үүслээ. Үүний тулд иргэдийн газрыг хэрхэн чөлөөлөх, үнэлэх, дэд бүтцийн эргэлтэд оруулахад шаардлагатай бодлого, судалгаа хэрэгтэй байна. Мөн Хөшөөт, Эрдэнэбүрэнгийн УЦС, Халзанбүргэтэй газрын ховор элементтэй холбоотой хэрэгжих төсөл зэргийг авч үзсэн ч манай нутаг уул уурхайн гол бүс боллоо. Монгол Улсын Засгийн газрын түвшинд бид уул уурхайн ашиглалт, хамгаалалт, хөрөнгө оруулалт зэрэгтэй хэрхэн харьцах ёстой зэрэг мэдээ мэдээлэл сонсохыг зорьж байна” гэв.

НИТХ-ын дарга А.Баяр “Олон ястны өлгий нутаг, баруун бүсийн тулгуур төв болсон Ховд аймгийн хөгжил цэцэглэлтийн төлөө иргэдийн төлөөллийн үүргээ биелүүлж яваа та бүхний ажилд амжилт хүсье гээд Нийслэлийн бэлгэ тэмдэг Хангарди бүхий дурсгалын зүйл гардууллаа.