Халдварт өвчин судлалын үндэсний төвөөс менингококкт халдварын нөхцөл байдлын талаар мэдээлэл өглөө.

ЭМЯ-ны Нийгмийн эрүүл мэндийн бодлогын газрын дарга Л.Баттөр "Эндсэн хүүхдийг менингококкт халдвар авсан гэх буруу мэдээлэл цацагдсан. ЭМЯ-ны сошиалд өчигдөр шөнө тавигдсан мэдээлэл байна. Зарим хүмүүс тухайн хүүхдийн ямар өвчний улмаас эндсэн шалтгааныг тодорхойлохгүйгээр таамаглал байдлаар менингококкт халдвар авсан гэх буруу мэдээлэлтэй байна. Өнгөрсөн оны сүүлд таван сэжигтэй тохиолдол байсан. Үүнээс шинжилгээ хийж хоёр менингококкт халдвар батлагдаж эмчлэгдэж бүрэн эдгэсэн. Үүнтэй холбоотой тархвар судлалын хариу арга хэмжээ авсан. Он гарснаас хойш нийт гурван сэжигтэй тохиолдлоос нэг нь батлагдаж харамсалтай нь тухайн хүүхэд эндсэн. Бусад хоёр сэжигтэй тохиолдол эмгэг төрөгч илрүүлэх шинжилгээ хийж байна. Сэжигтэй тохиолдлуудын хариу хоёрдугаар сарын 4, 6-нд гарна. Дахин хэлэхэд одоогийн байдлаар менингококк халдварын сэжигтэй хоёр тохиолдол гарсан байгаа.

Эхнийх нь нийслэлийн Баянгол дүүрэгт бүртгэгдсэн. Тухайн хүүхэд хоёрдугаар сарын 18-наас хойш хичээлдээ яваагүй гэдэг мэдээллийг өгсөн.

Хоёрдугаарт Бяанзүрх дүүргийн 311 дүгээр цэцэрлэгт сэжигтэй нэг тохиолдол илэрсэн. Тухайн цэцэрлэгт илэрсэн сэжигтэй тохиолдолтой нийлээд 9 хүүхэд байсан. Тэдгээр хүүхдүүдийг гэрээр нь тусгаарласан бөгөөд одоогоор эмнэлзүйн шинж тэмдэг байхгүй. Аль аль нь дээр нь шинжилгээний хариу эцэслэгдэж гараагүй байгаа. 48-58 цагийн дараа эцсийн хариуг авах боломжтой. Хүүхдүүдийн биеийн байдал одоогоор тогтвортой байна. ХӨСҮТ, ЭМЯ-ны цахим хуудсаар цаг үеийн мэдээллийн өгч байгаа. Тиймээс цахим орчин дахь аливаа албан бус мэдээлэлд шүүлтүүртэй хандахыг хүсч байна" хэмээсэн.

ХӨСҮТ-ийн халдвар судлаач их эмч Ч.Уртнасан "Менингококк халдварын үед хүүхэд өндөр халуурсан ч гар нь хүйтэн, царай нь цонхийсон байдаг. Халдварын нууц үе 3-10 хоног байдаг. 5-7 хоногт шинж тэмдэг нь илэрдэг. Бага насны хүүхэдтэй айл бүр гэртээ халууны шилтэй байх хэрэгтэй байна. Хүүхдээ халуурч байна гэж үзвэл халууныг нь үз.

Дур мэдэн халуун буулгах эмчилгээ хийж, эмнэлэгт хандахгүй цаг алдаж болохгүй. Менингококк халдварын гол шинж тэмдэг нь гэнэт өндөр халуурах, хоол идэхгүй болох, цонхийж цайх, биеэр тууралт гарсан тохиолдолд яаралтай эрүүл мэндийн байгууллагад хандах хэрэгтэй. Хүндрэл эндэгдэл өндөртэй өвчин учраас хүүхэд тань 39-40 хэм хүртэл өндөр халуурч, тууралт гарч эхэлбэл цаг минут алдахгүйгээр эмнэлэгийн байгууллагад хандах хэрэгтэй." гэжээ.