Нийслэлийн иргэдийг хоёр гурван жилээр хорт утаагаар утаж байгаа “Таван толгой түлш” нийслэлийн өмчит ХХК-ийн удирдлагууд Улаанбаатар хотын утааг арилгасан хэмээн удирдах зөвлөлийн гишүүдээ 1,1 тэрбум төгрөгөөр шагнажээ. Энэ компанийн эрх барьж мөнгө зарцуулж байгаа НИТХ-ын дарга, компанийн Төлөөлөн удирдах зөвлөлийн дарга Ж.Батбаясгалан “нийслэл хотыг утаагүй, агаарын бохирдолгүй болгосон”-ыхоо төлөө өөрийгөө 64 сая төгрөгөөр шагнасан гэнэ.  Хөөрхийг “авахгүй авахгүй” гээд байхад нь удирдах зөвлөлийн гишүүд нь “нийслэл хот утаагүй болчихоод байхад  удирдан зохион байгуулсан та авалгүй яахав, май” гээд өгчихсөн ч байж болох. 

“Тавантолгой түлш” ХХК-иас Зерован ХХК-д нийт найман удаагийн гүйлгээгээр 57.6 сая төгрөгийг шилжүүлсэнийг  тус компанийн гүйцэтгэх захирал Б.Энхчулуун зарлагадаж, улмаар иргэн О.Ууганбаярын Төрийн банк дахь хадгаламжийн дансанд шилжүүлсэн байна. О.Ууганбаяр нь Тавантолгой тулш ХХК-ийн еренхий нягтлан бодогчоор ажиллаж байсан П.Амарцэцэгийн нөхөр болох нь УБЕГ-ын лавлагаагаар нотлогдсон байна” хэмээн Хуульзүй дотоод хэргийн сайд Б.Энхбаяр мэдэгдэв. Угтаа бол Тавантолгой Түлш ХХК нь 2023 оны гуравдугаар улирлын санхүүгийн тайлангаар нийт 997.2 тэрбум төгрөгийн өр төлбөртэй, 583.9 тэрбум төгрөгийн хуримтлагдсан алдагдалтай ажиллаж байгааг шинжээч Нүүрсний сонсгол дээр мэдэгдэж байдаг.  Та бидний татвараар хуримтлагдсан мөнгийг энэ эрх баригчид зүгээр л ингээд нөхөр, эхнэрийнхээ хадгаламжийн данс руу шилжүүлээд завшиж суудаг юмсанж. 

Гэтэл нөгөө талд нь агаарын бохирдол утаа арилаагүйгээр үл барам улам ихэсч жил бүрийн өвөл өчнөөн хүн угаартаж амь алдсаар байдаг. Ж.Батбаясгалангийн удирдлагаар үйлдвэрлэн иргэдэд түгээж байгаа шахмал түлшнээс болж энэ түлшийг хэрэглэсэн зөвхөн өнгөрсөн 2022 оны өвөл гэхэд л 27 хүн угаартаж амиа алдсан байдаг. Амиа алдаагүй ч, эрүүл мэндээрээ хохирч эмнэлгийн тусламж авсан хүний тоо жилээс жилд нэмэгдсээр. 

Амиа алдаагүй, эмнэлгийн тусламж аваагүй ч нийслэлийн 1,5 сая хүн хорт утаагаар утуулан эрүүл мэндээрээ хохирсоор л байгаа. 

Хэдхэн жилийн дараа уушигны хорт хавдар тэргүүлэн, сэтгэл түгшээж эхэлнэ гэж Монгол Улсын гавьяат эмч Ж.Чинбүрэн хэлээд байдаг. Эрх баригчид үүнийг арай зөвхөн тамхинаас болно гэх гээд байгаа юм биш биз. 

Одоо ингээд “НҮҮРСНИЙ СОНСГОЛ” гэдэг энэ жүжиг зүгээр л ингээд СОНСООД өнгөрөөд байх уу. Улс ард түмний мөнгийг энэ эрх баригчид эхлээд хэдэн зуун мянгаар, дараа нь саяар идэж завшаад үүнийхээ төлөө албан тушаал дэвшээд байдаг байсан. Одоо тэрбумаар, их наядаар нь идэж завшаад байхад зүгээр л Сонсгол хийгээд, сонсоод суух уу. 

Монгол Улс хуулийн засаглалтай. Харамсалтай нь хуулийг хэрэгжүүлэх УИХ, Засгийн газар, хууль шүүхийн байгууллагууд нь үүнийгээ хэрэгжүүлэх нь бүү хэл хулгайчидтай үгсэн хуйвалдаж эрх мэдэл мөнгө хөрөнгөтэй хүмүүсийг хаацайлсаар байх уу. 

Хүний гар утас хулгайлсан насанд хүрээгүй хүүхдэд 10 жилийн ял өгдөг шүүгчид хэдэн тэрбум, их наядаар хулгайлсан хүмүүсийн толгойг илэн хаацайлсаар л суух гэж үү. Монгол Улс байнгын парламент, хууль тогтоох байгууллагатай боллоо, өнөөдөр нийт 437 хууль хүчин төгөлдөр үйлчилж байгаа гэдэг. Ард түмний мөнгөөр наадаж, хуулийн хариуцлагаас бултах гэсэн хэсэг нөхөд УИХ-ын гишүүн хэмээн таахалзаж, хуралдаа ч суухгүй хэд гуравхан хүн нь хууль баталсан болж тоглоод л суудаг. Цөөн ч гэсэн хүний баталж, УИХ-ын тамга дарж хүчин төгөлдөр болсон хуулиудаа хэрэгжүүлэлгүй, хулгайч, хуалчдыг хаацайл­саар байх юм уу, яах вэ гэдэг асуулт гарч ирээд л байдаг. Хэн хэзээ хариулах вэ, энэ дарга нар, эрх баригчид уу, энэ олон хулгайч уу. Эсвэл ард түмэн үү.......Хуулийн засаглалтай эрхзүйт Монгол Улсад хууль яаж үйлчилд­гийг хармаар л байна санж.

Эх сурвалж: Монголын мэдээ сонин

2023 оны арванхоёрдугаар сарын 22. Баасан. №187 (5915)