Олон нийтийн сүлжээгээр Хэнтийнхэн зутарч байна гэсэн мэдээлэл түглээ. Яг өнөөдрийн байдлаар бол төсвийн санхүүжилтийн бараг талыг авсан Хэнтийнхэн биш, ес эхлэх гэж байгаа, цас ихтэй ид хүйтэн энэ өдрүүдэд нийслэл Улаанбаатар хотынхон л зутарч байх шиг. 

Шөнөдөө бараг 40, өдөртөө 30 градус хүрч хүйтэрч байгаа энэ өдрүүдэд нийслэлд нэг ч автобус нэмэгдээгүй байтал автомашиныг тэгш сондгой дугаараар зорчих журамд шилжүүлсэн нь автобусны буудлуудад дүүрэн хүн бээрч, даарч,  удаж удаж ирсэн нэг автобус нь дүүрэн хүнтэй ирэн хүмүүсийг уралдуулан, чихэлдүүлж ёстой “бяд”-ыг нь шалгаж байна. 

Дээрээс нь баяр ёслол өдөр хоногоор ойртож байгаа болохоор нэг их нэгдсэн шинэ жил баяр ёслол гэхгүй ч гэр орондоо хүүхэд багачуудаа баярлуулах гэсэн хүмүүс дэлгүүр худалдааны төвөөр зорчих хөдөлгөөн улам ихсээд байгаа.  

Ард иргэд  бөөн халтиргаатай замаар бэдчиж, хэзээ ирэх нь мэдэгдэхгүй автобус хүлээн буудал дээр чичирч зогсоход ард түмний мөнгөөр авсан том том жип унасан дарга ямбатнууд, ар түмний мөнгөөр авсан бензинээр дэргэдүүр нь цас манарган давхихдаа тэр олныг цонхоороо харан даажигнан “бяд”-гүйгээр дуудан өнгөрнө. 

Уг нь ард иргэд машинаа өөрийнхөө мөнгөөр өөрөө худалдаад авсан, татвар хураамжаа төлчихсөн, оношилгоо энэ тэрд нь оруулаад бичиг зөвшөөрлөө авсан, жилийн 365 хоног зам ашиглах татвараа төлчихсөн атлаа ингээд  машинаа унах эрхээ хасуулчихаад хар хүйтэнд ингэж зогсох нь хэр зохистой юм бол. Дээрээс нь эрх баригчид ингэж туйлдаж байгаа  ард түмнээ “улны”, “бядгүй” хэмээн бараг л “хохь нь” гэх халгүй цоллоно. 

Монгол Улсын нийт хүн амын бараг тал хувь болох 1,5 сая хүнтэй, хааш хаашаа тэлсэн нийслэл хотод нөхцөл байдал ийм байхад Хэнтий аймгийнхан зутарч байна гэж хэн бичиж байна. Арай олны нэрлэдгээр эрх баригчдын “тролл”-ууд дээдсийнхээ захиалгаар бичээд байгаа юм биш биз. 

Ийн  Хэнтий аймгийнхан  зутарч байна гээд байдаг нь “зутарсан аймагт тусалж байна” хэмээн аанай л ард түмний хөрөнгөнөөс өдий төдийг татан тийш илгээж ирэх сонгуулийн сурталчилгаа хийх гэсэн ядмаг арга биш гэж хардах хүн гарч ирж л байна. Тэндээс УИХ гэдэг хуулийн хамгаалалттай газар бүгэж ямар ч эрсдэлгүйгээр насан туршдаа зөөлөн суудалд суун  улс ард түмний хөрөнгөнөөс завшиж байх санаатай хүн нэг биш хэд хэд бий дээ. 

Цаг улирал цас зудны тухайд бол Хэнтий аймгаас илүүтэй зутарч байгаа аймаг нэг биш хэд хэд байгаа. Зарим аймагт угаасаа зун намар хур бороо багатай гантай, гандуу байсан дээр цас нэмэн нэмэн орсоор бэлчээргүй шахам болж байна. Зарим аймагт цас шуурганаар уруудсан олон мянга адуу орж очин нөхцөл байдлыг улам хүндрүүлж байгаа. Яг үнэндээ Хэнтий байтугай зутарч байгаа аймаг сум бишгүй нэг. 

Өнөөдрөөс 10 хоногийн өмнө гаргасан судалгаагаар 11 аймгийн 40 сум цагаан зудтай, 12 аймгийн 48 сум зудархуу байна гэжээ. Нийт нутгийн 26 хувьд нэн их, 43 хувьд их зудын эрсдэлтэй гэж гарсан. Гэтэл түүнээс хойш шөнө бүр цас нэмэн орж, шуурсаар энэ тоо өнөөдөр өчнөөнөөр нэмэгдсэн нь лавтай. Цаг уурын байгууллагаас гаргасан мэдээллээр 2023 оны арванхоёрдугаар сарын 18-ны өдрийн байдлаар нийт нутгийн 90 орчим хувьд цасан бүрхүүл тогтсон гэж байна. 

Гэтэл ганцхан Хэнтий аймаг л хүндрээд хүн мал нь зутраад байна гэдэг нь юу хэлээд байгаа юм бол.

Эх сурвалж: Монголын мэдээ сонин

2023 оны арванхоёрдугаар сарын 21. Пүрэв. №186 (5914)