Өвөрхангай аймгийн Баянгол сумын “Улсын тэргүүний цэцэрлэг” урлаг заал бүхий өргөтгөлийн шинэ барилгаа хүлээн авч, хөдөөгийн бяцхан үрс тав тухтай орчинд хөгжиж, хүмүүжих боломж нэмэгдлээ.

Уг цэцэрлэг анх 1965 онд “Хүүхэд саатуулах газар” нэртэйгээр 1 багш, 2 ажилтан 25 хүүхэдтэйгээр үйл ажиллагаагаа явуулж эхэлсэн түүхтэй.

Сумын хүн ам жилээс жилд өсөж, малчид хүүхдээ сургуулийн өмнөх боловсрол олгохыг илүүд үзэх болсон өнөө үед цэцэрлэгийн хүчин чадал, анги танхим хүрэлцэхгүйд хүрсэн тул хоёр ангитай, хүүхдүүдэд урлаг, гоо зүйн боловсрол олгоход зайлшгүй шаардлагатай урлаг заал бүхий өргөтгөлийн барилга барих санхүүжилтийг 2023 оны улсын төсөвт суулгуулан “Сонор Бүрд” ХХК төлөвлөсөн хугацаандаа гүйцэтгэж, ашиглалтад оруулж байгаа нь энэ юм.

2023-2024 оны хичээлийн жилд тус цэцэрлэг хамран сургах тойргийн 300 гаруй хүүхдээс өдрийн бүлэгт 125, өөр баг хороонд 110, нүүдлийн бүлгээр 68 хүүхэд хүмүүжиж байгаа аж. Цэцэрлэгт хамрагдаж буй хүүхдүүдийн 167 буюу 55 хувь нь малчин өрхийн хүүхэд байна.