Цагдаагийн байгууллагаас жагсаал, цуглааны нөхцөл байдлын талаар мэдээлэл хийлээ.

ЦЕГ-ын Нийтийн хэв журмыг хамгаалах, олон нийтийн аюулгүй байдлыг хангах албаны дарга Н.Лхагвасайхан" Цагдаагийн ерөнхий газраас иргэдийн үзэл бодлоо илэрхийлэх эрхэд хүндэтгэлтэй хандаж, аюулгүй байдлыг ханган ажиллаж байна. 

Өдөрт дунджаар 800-2500 иргэн жагсаалд оролцож байна. Энэ хугацаанд жагсаал, цуглаантай холбоотойгоор гэмт хэргийн шинжтэй 14 гомдол мэдүүлэг, ЦЕГ-т ирсэн. Мөн зөрчлийн шинжтэй 28 нь дуудлага мэдээлэл бүртгэгдсэн. Манай албанаас жагсаал, цуглаанд оролцохдоо иргэдийг эрүүл мэнд аюулгүй байдлаа хангаж оролцох, бага насны хүүхдийг жагсаал цуглаанд оролцуулахгүй байх зөвлөмжийг хүргэж ажиллаж байна. Гэсэн хэдий ч жагсаал, цуглаанд оролцогсод согтууруулах ундаа хэрэглэж, бусдыг хууль бус зүйд өдөөн хатгаж, өөрийгөө шатаах зэрэг үйлдэл гарсаар байгаа юм.

Тодруулбал энэ сарын 10-ны өдөр согтууруулах ундаа хэрэглэсэн иргэд жагсагчдад халдах оролдлого хийсэн. Үүнийг ЦЕГ-аас шуурхай таслан зогсоож 15 иргэнд холбогдох шалгалтыг явуулж, найман иргэнийг эмнэлгийн байгууллагад хүлээлгэн өгсөн. Мөн энэ сарын 15,16-ны өдрүүдэд жагсаал цуглаанд оролцож байсан иргэн бие дээрээ шингэн зүйл асгаж өөрийгөө шатаах гэж оролдсон.

Энэ үйлдлийг цагдаагийн байгууллагаас таслан зогсоож, шалгалтын ажиллагааг зохион байгуулж байгаа. Ийнхүү жагсаал, цуглааны үед дээрх үйлдлүүдээс үүдэн гарах эрсдэлийг цуглааныг зохион байгуулж байгаа иргэн, хуулийн этгээд бүрэн хариуцна гэдгийг хууль тогтоомжид заасан байдаг" гэлээ.