Улсын Хоёрдугаар Төв эмнэлгийн Бөөрний мэс заслын тасаг нь БӨӨРНИЙ ХАВДРЫН үеийн мэс заслын эмчилгээ, тусламжийг үзүүлж байна.

Үүнд бөөр, шээсний замын чулуужих өвчин, хорт хавдар, бөөрний хавдар, давсагны хавдар, түрүү булчирхайн хоргүй томрол, эрэгтэйчүүдийн үргүйдэл судлалын мэс засал зэрэг төрөлжсөн нарийн мэргэжлийн тусламж, үйлчилгээг нэг зөвлөх эмч, дөрвөн эмчийн бүрэлдэхүүнтэйгээр хийж байгаа аж. Энэ талаар тус эмнэлгийн Бөөрний мэс заслын тасгийн мэс заслын эмч А.Ханхонгор "Бөөрний мэс заслын тасаг нь бөөр, шээсний замын өвчлөлийн бүх төрлийн  тусламж үйлчилгээг  үзүүлж байна. Үүнд бөөр шээсний замын чулуужих өвчин, хорт хавдар, бөөрний хавдар, түрүү булчирхай болон давсагны  хавдар, түрүү булчирхайн хоргүй томрол, эрэгтэйчүүдийн  үд эс судлалын мэс засал зэрэг төрөлжсөн нарийн мэргэжлийн тусламж, үйлчилгээг зөвлөх нэг эмч, нийт дөрвөн эмчийн бүрэлдэхүүнтэй үзүүлж ажиллаж байна.

Бөөрний хорт хавдрын үед  бөөрний хорт хавдрыг хэсэгчлэн болон бүхэлд нь тайрах аргаар хийдэг. Үүнийг хэвлийн дурангаар болон нээлттэй  мэс заслын аргаар хийж байна. Тухайлбал, олон улсын стандартаар  хэвлийн арын зайгаар  бөөрний хорт хавдрыг хэсэгчлэн тайрах мэс заслыг түлхүү хийж байна. Дурангийн мэс засал нь нээлттэй мэс засалтай харьцуулахад шарх, сорив бага байдаг бөгөөд мэс засалд орсон хүн амьдралын энгийн хэв маягт ороход хурдан. Жишээлбэл, 5-6 хоног л зарцуулж байна.

Хорт хавдрын мэс засалд орсон өвчтөнүүд хоёр жилийн хугацаанд эмчийн хяналтад байдаг. Үүнээс хойш хяналтыг таван жил дотор өвчтөний өөр бусад эрхтэнд хавдрын үсэрхийлэл гарахгүй бол тухайн хүн бүрэн эдгэрсэн гэж үзэж байгаа. Хорт хавдрын дараах хяналт болон тусламж үйлчилгээг манай эмнэлэг хийж байна." гэв.