Эрүүл Мэндийн Яамнаас цаг үеийн асуудлаар мэдээлэл хийлээ.

Эрүүл мэндийн сайдын зөвлөх О.Батбаяр" Омикроны ВА4, ВА5 хувилбараас үүдэлтэй халдварын тоо дэлхий дахинд эрчимтэй нэмэгдэж байна. Өнгөрсөн долоо хоногийн халдварын тохиолдлын тоог бүсчлээд үзвэл Зүүн өмнөд Азид 37 хувиар өссөн байна. Мөн Япон, БНСУ-д тохиолдлын тоо 2-3 дахин нэмэгдсэн. ВА4, ВА5 хувилбаруудын шинж тэмдэг ижил боловч ВА5 хувилбарын халдварлах чадвар илүү өндөр. Манай улсын хувьд ХӨСҮТ-ийн генийн дараалал тогтоох лабораторийн шинжилгээний дүнгээс харахад BA4, BA5 хувилбарын эзлэх хувь нийт халдварын 10 орчим хувьд байгаа.

Цаашид 80-90 хувьд хүрэх магадлалтай. Омикроны ВА4, ВА5 нь омикроны сүүлийн хувилбар биш. Дахин өөр хувилбар гарах боломжтой гэдгийг эрдэмтэд анхааруулж байгаа. Тиймээс дархлааны дараагийн тундаа хамрагдахыг уриалж байна. 

Энэхүү халдварын давлагаа нь улс орнуудад 2-3 сар үргэлжилж байна. Шинж тэмдгийн хувьд хамраас шингэн нус гоожих, хоолой өвдөх, хоолой хорсох мөн тасралтгүй ханиалгах зовуурь илэрч байна. Мөн ядрах, булчин шөрмөсөөр, үеэр өвдөх, халуурах, гурав дахь өдрөөс цээжээр өвдөж их ханиаснаас болж жижиг нарийн судаснууд гэмтэж цустай ханиах гэх мэт шинж тэмдгүүд илэрч байна" гэлээ.