БНАСАУ өчигдөр өглөө шинэ загварын өндөр хүчин чадалтай пуужингийн хөдөлгүүр туршиж, туршилт нь амжилттай болсон талаар тус улсын төрийн мэдлийн агентлаг уламжиллаа.  Энэхүү туршилт амжилттай болсноор БНАСАУ бүх төрлийн хиймэл дагуул хөөргөх боломжтой болж байгаа юм. Тус улсын залуу удирдагч Ким Жон Ун ч эрх баригч Хөдөлмөрийн намын хурал дээр энэ талаар мөн мэдээлжээ. 

Пхеньяны зүгээс шинэ загварын пуужингийн хөдөлгүүрийг хиймэл дагуул хөөргөхөд гарсан дэвшил хэмээн дамжуулж байгаа. Гэвч Сөүл, Вашингтоны тал хиймэл дагуул нэрийн дор холын тусгалт  баллистик пуужингийн  хөдөлгүүрийн туршилтыг хийсэн  байх магадлалтай хэмээн хардаж байна.  Залуу удирдагч Ким туршилтын зорилгын талаар “Шаталтын онцлог, хяналтын системийн хэвийн ажиллагаа зэргийг хамгийн сүүлийн байдлаар бататгах зорилгоор туршилт хийсэн” гэх тайлбар хийжээ.  

Мөн туршилт амжилттай болсны дараа хиймэл дагуул хөөргөх бэлтгэл ажлыг яаралтай зохион байгуулахыг даалгасан байна.  Пхеньян энэ сарын 9-нд тав дахь удаагийн цөмийн зэвсгээ туршсан. Улмаар үүнтэй холбоотойгоор Сөүл дайны бэлэн байдалд шилжиж, АНУ стратегийн бөмбөгдөгч онгоцоо илгээсэн юм.

Мөн Японы Өөрийгөө хамгаалах цэргийн хүчин ч БНСУ-д дэмжлэг үзүүлнэ гэдгээ илэрхийлсэн билээ. Тав дахь удаагийн цөмийн туршилт хийсний дараа Пхеньян баллистик пуужинд цөмийн цэнэгт хошуу байрлуулах боломжтой болсноо зарласан байдаг.  Харин энэ удаа шинэ загварын өндөр технологийн пуужингийн хөдөлгүүртэй болсноо зарласан нь олон улсын анхаарлыг татаж эхэллээ.

Үүнээс гадна Хөдөлмөрийн намын төв хэвлэлд гарсан зурагт өнгөрсөн дөрөвдүгээр сард болсон ICBM загварын тив хоорондын баллистик пуужингийн туршилттай яг адил дүр зураг дүрслэгдсэн байна. Харин хажууд нь Ким цэргийнхнийхээ хамт инээн зогсож буй байдал хэвлэлийн хуудаснаа гарчээ. Үүний хариуд БНСУ-ын Батлан хамгаалах яам мэдэгдэл хийсэн бөгөөд “Пхеньяны талын мэдээлэл үнэн бол тэдний пуужингийн хөдөлгүүрийнх нь хүчин чадал дээшилсэн гэсэн үг.

Туршилт үнэхээр амжилттай болсон эсэхийг шалгаж тогтоох шаардлагатай” гэжээ.  БНАСАУ-д ирэх сарын 10-нд Хөдөлмөрийн нам байгуулагдсаны 71 жилийн ой болох юм.  Ямартай ч, дэлхийн хамгийн хаалттай орны дарангуйлагч Ким энэ удаа шинэ загварын хөдөлгүүрийг туршсан нь хиймэл дагуул, эсвэл  холын тусгалт пуужинд зориулагдсан  уу гэдэг нь одоогоор тодорхойгүй байна.