Орхон аймагт 2021-2024 онд хэрэгжих “Эмэгтэйчүүдийн хөгжлийн хөтөлбөр”-ийн нээлтийн үйл ажиллагаа Уурхайчин соёлын ордонд зохион байгуулагдаж байна. 

Нээлтийн үйл ажиллагаанд аймгийн ИТХ-ын дарга Д.Мөнхбат, Засаг дарга С.Батжаргал, Засаг даргын орлогч А.Түвшинжаргал, М.Түмэнжаргал, “Эрдэнэт Үйлдвэр” ТӨҮГ-ын санхүү эрхэлсэн орлогч дарга Үүрийнтуяа нар оролцлоо. 

Үйл ажиллагааг нээж ИТХ-ын дарга Д.Мөнхбат үг хэлсэн юм. Тэрээр: “Эмэгтэйчүүдийн хөгжлийн хөтөлбөр” нь Эмэгтэйчүүдийг чадавхжуулах, шийдвэр гаргах түвшний оролцоо-манлайллыг нэмэгдүүлэх, жендэрийн хэвшмэл ойлголтын талаарх мэдлэг олгох, эрүүл амьдралын дадал бий болгож, эерэг хандлагыг төлөвшүүлэх, эдийн засгийн чадавхыг бэхжүүлэх зорилгоор хэрэгжүүлж буй бидний ажлын анхны алхам гэдгийг онцоллоо. 

Мөн аймгийн Засаг дарга С:Батжаргал мэндчилгээ дэвшүүлж үг хэллээ. Тэрээр “Тэгш оролцоог хангасан, хүний хөгжлөөр тэргүүлсэн аймаг болох зорилтыг тавьж ажиллаж буй энэ үйл явцад эмэгтэйчүүд та бүхний дуу хоолой, итгэл үнэмшил, хувь нэмэр нэн чухал бөгөөд өнөөдрийн "Эмэгтэйчүүдийн хөгжлийн хөтөлбөр”-ийн нээлтийн арга хэмжээнээс гарах үр дүн олон эмэгтэйчүүдийн үзэл бодолд эерэг өөрчлөлтийг авчирна гэдэгт найдаж”гэв. 

Хөгжлийн хөтөлбөрийн нээлтийн арга хэмжээнд гал голомт үндэсний хөдөлгөөн ТББ-ын тэргүүн Д.Мөнхөө цахим мэндчилгээ илгээж, МУАЖ А.Долгор ая дууны мэндчилгээ дэвшүүллээ. 

"Эмэгтэйчүүдийн хөгжлийн хөтөлбөр” нь Монгол улсын Алсын хараа-2050, Орхон аймгийг хөгжүүлэх таван жилийн үндсэн чиглэл, Орхон аймгийн Засаг даргын 2020-2024 онд хэрэгжүүлэх үйл ажиллагааны хөтөлбөр зэрэг бодлогын баримт бичгүүдэд салбар бүрт эмэгтэйчүүдийн манлайлал оролцоог нэмэгдүүлэх, гэр бүлд суурилан хөгжүүлэх чиглэлээр үйл ажиллагаануудыг тусгасны нэг илрэл нь аймгийн ИТХ-ын 2021 оны 61 дүгээр тогтоолоор батлагдсан. 

Эмэгтэйчүүдийн хөдөлмөр эрхлэх боломж бололцоог бүрдүүлэх, нөхөн үржихүйн болон эх нялхсын эрүүл мэндийн үйлчилгээг сайжруулах, нийгмийн халамж хамгааллын үйлчилгээг өргөжүүлэх, шийдвэр гаргах түвшинд эмэгтэйчүүдийн оролцоог нэмэгдүүлэх, чадавхижуулах, нийгмийн манлайлалыг нэмэгдүүлэх, бүх түвшинд эмэгтэйчүүдийг дэмжих зэрэг олон асуудлыг эдийн засаг, нийгмийн хөгжлийн асуудлуудтай холбон цогц байдлаар шийдвэрлэх нь үр дүнтэй юм.