Хубилай сэцэн хааны мэндэлсний 805 жилийн ой энэ онд тохиож байна. Хубилай сэцэн хаан нь Монголын хаадын алдар сууг манлайлан, дэлхийн түүхэнд тодоор бичигдсэн хаадын нэг юм. Түүний мэндэлсний 805 жилийн ойд зориулан “Хубилай хаан ба монгол жанжид” үзэсгэлэнг Монголын үндэсний музей, Чингис хааны лаан баримлын музей, “Мөнх тэнгэрийн цаг” ТББ хамтран зохион байгуулж байна. Үзэсгэлэн энэ сарын 23-ны өдрөөс аравдугаар сарын 23-ныг хүртэл Монголын Үндэсний музейд болно.

Хубилай хаан түүний шадар баатруудын дүр төрхийг сэргээн урласан сонирхолтой лаан баримлуудыг толилуулахаас гадна Монголын Үндэсний музейн сан хөмрөг хадгалагддаг Юань гүрний үед холбогдох хосгүй үнэт үзмэрээ дээжлэн дэлгэх аж.

Хубилай сэцэн хаан IV жарны хөхөгчин гахай жилийн намрын эхэн сарын 15-ны хөхөгчин туулай өдөр Хэрлэнгийн ордноо Толуйн их хатан Сорхугтани бэхигээс мэндэлсэн билээ.