Бөөрний архаг дутагдалд орсон хүнийг гемодиализын аппаратгүйгээр төсөөлөхийн аргагүй. Өөрөөр хэлбэл, бөөрний архаг дутагдалтай иргэд долоо хоног 3-4 удаа гемодиализын аппаратаар бөөр орлуулах эмчилгээг хийлгэх шаардлагатай байдаг билээ. Манай улсад сүүлийн хэдэн жил энэ төрлийн өвчлөл нэмэгдэж байгаа бөгөөд улсын эмнэлгийн гемодиализын аппарат хүрэлцдэггүй байна. Тэгвэл бөөр орлуулах эмчилгээний нэг төрөл болох гемодиализ эмчилгээний чанар, хүртээмжийг нэмэгдүүлэх, иргэдэд учирч байгаа санхүүгийн хүндрэлийг арилгах зорилгоор төр, хувийн хэвшлийн түншлэлийн хүрээнд хувийн хэвшлийн эрүүл мэндийн байгууллагаар гемодиализийн тусламж, үйлчилгээг гүйцэтгүүлэх сонгон шалгаруулалтыг зохион байгуулж байгаа ажээ. Гемодиализ эмчилгээ, үйлчилгээ үзүүлэх эрх бүхий долоон  эрүүл мэндийн байгууллага шалгарч Эрүүл мэндийн яам, Эрүүл мэнд, нийгмийн даатгалын ерөнхий газар хооронд эмчилгээний чанар, үр дүнд хяналт тавьж, худалдан авахаар чиглэлээр хамтран ажиллах зорилгоор “Эрүүл мэндийн даатгалын сангаар  дамжуулан гемодиализ эмчилгээг санхүүжүүлэх гэрээ”-г байгуулсан юм.

Уг гэрээний үр дүнд 2017 оны хоёрдугаар сарын 15-наас эхлэн хувийн хэвшлийн долоон эрүүл мэндийн байгууллагаар 154 иргэн үнэ төлбөргүй чанартай эмчилгээ, үйлчилгээнд хамрагдан нийслэлийн хэмжээнд хүлээгдэлгүй болсон гэнэ.

Иргэд улсын эмнэлгээс гадна “Люкс диализ клиник”, “Эрин”, “Интермед”, “Улаанбаатар мед”, “Агапе хоспис”, “Кидней Кейр” эмнэлэгт бөөр орлуулах эмчилгээнд  хамрагджээ.  Мөн орон нутагт 16 аймаг гемодиализ эмчилгээг хийх хүчин чадалтай болсноор иргэн удаан хугацааны эмчилгээ шаардагддаг гемодиализ эмчилгээг оршин суугаа нутаг дэвсгэртээ хамрагдах боломж бүрдсан байна. Цаашид Хөвсгөл, Архангай,  Төв аймаг, Халдварт өвчин судлалын үндэсний төвд нийт найман гемодиализийн аппарат суурилуулах бэлтгэл ажлыг ханган ажиллаж байгаа ажээ.