Тайландад 2014 онд цэргийн эргэлт хийснээс хойш өчигдөр гурав дахь жилийнхээ ойтой золголоо. Ерөнхий сайдын үүргийг түр орлон гүйцэтгэж буй Прают Чан Очагийн тэргүүлж буй цэргийн Засгийн газрын тогтоосон онц байдал эдүгээ хүртэл үргэлжилж байна.

 

Тайландын шинэ эзэн хаан Маха Важиралонгкорн өнгөрөгч дөрөвдүгээр сард шинэ Үндсэн хуульд гарын үсэг зурж баталсанаар тус улсад ардчилсан тогтолцоог нэвтрүүлэх, бүх нийтийн сонгууль болох боломж нээгдсэн юм. Эзэн хаан гарын үсэг зурснаас хойш хүчин төгөлдөр мөрдөгдөж эхэлсэн тус хуулийн дагуу бүх нийтийн сонгууль хамгийн эртдээ гэхэд 2018 оны сүүлийн хагаст зохион байгуулагдах төлөвтэй байгаа билээ. Эдүгээ тус улсыг армийнхан голдуу гишүүдээс бүрдэх Засгийн газар удирдаж буй бөгөөд тэд гурван жилийн өмнө цэргийн эргэлт хийж, бүх эрх мэдлийг гартаа авсан юм. 

 

Гэхдээ бүх нийтийн сонгууль явуулахаар товлож байгаа ч, цэргийн Засгийн газраас ардчилсан, иргэний оролцоот засаглал руу шилжих үйл явц удаашралтай байх хандлага ажиглагдаж байгааг олон улс судлаачид онцолжээ.  Тайландад Ерөнхий сайд асан Ийнглак Чинавыг огцрохыг шаардсан эсэргүүцлийн жагсаал газар авч, Засгийн газар, яам, тамгын газруудын үйл ажиллагаа бүрэн зогсох хэмжээний онц байдал үүсч байв.

 

Улмаар Ерөнхий сайдыг дэмжигч болон эсэргүүцэгч гэсэн хоёр хэсэгт хуваагдсан иргэд хоорондоо мөргөлдөөн үүсгэж, эмх замбараагүй нөхцөл байдал үүссэнтэй холбоотойгоор хэв журам, тогтвортой байдлыг сахиулах зорилгоор цэргийнхэн бүх эрх мэдлийг гартаа авч, түр Засгийн газар байгуулан Ерөнхий сайдаар нь Прают Чан Оча томилогдсон билээ. Тэгвэл цэргийн Засгийн газрын тэргүүн ойн өдрийн босгон дээр өнгөрсөн хугацаанд гарсан ололт амжилтыг онцолжээ. Тэрбээр “Өнгөрсөн гурван жилд гарсан хамгийн том үр дүн нь энх тайван, хэв журмыг эргүүлэн сахиулсан явдал” гэсэн байна.

 

Улмаар үүний жишээ болгож, өнгөрсөн оны аравдугаар сард тус улсын өмнөх эзэн хаан Пхумипон Адульядит таалал төгсч, хаан сэнтийг хоёр сарын дараа түүний хүү болох  Маха Важиралонгкорнд залгамжлуулахад, ямар нэг  үймээн самуун гараагүй гэдгийг тодотгожээ. Гэтэл цэргийн эргэлт хийснээс хойш яг гурван жилийн ойн босгонд нийслэл Бангкок хотын цэргийн эмнэлэгт тэсрэх бөмбөг дэлбэрч, 20 гаруй хүн шархадсан гэсэн мэдээлэл гарсан юм. 

 

Нөгөөтэйгүүр, цэргийн Засгийн газар дэвшүүлсэн “Үндэсний шинэчлэл” болон “Үндэсний эвлэрэл” гэсэн бодлогынхоо хүрээнд тодорхой үр дүнд хүрч чадаагүй аж. Тус улсад таваас дээш хүнтэй улс төрийн цуглаан хийхийг хориглосон. Мөн өнөөгийн Засгийн газрыг шүүмжлэгч улстөрчид, нийгмийн зүтгэлтнүүдийг шахаж, хавчих явдал байсаар байгаа нь  ард түмний эрх чөлөөг ноцтойгоор зөрчиж байсан гэх шүүмжлэл гарч эхэлмэгц интернэт дэх хяналтыг чангатгаж, онлайн орчинд үйлдэгдэх гэмт хэргийн тухай хуулийг шинэчлэн баталснаас гадна хэвлэл мэдээллийн тухай хуульд ч тодорхой заалтыг оруулан, эрх баригчид хяналтаа улам чангатгасаар байгаа юм. 

 

Ийм үед дараагийн бүх нийтийн сонгууль 2019 он хүртэл хойшлогдож болзошгүй. Хэдийгээр цэргийнхэн 2018 оны сүүлийн хагаст явуулна хэмээн товлож буй ч, судлаачид “2019 оны сүүл үед сонгуулийг товлох магадлал өндөр байна. Засгийн газар сонгууль явуулах хугацаа нь болоогүй гэж үзвэл хугацааг сунгана” гэдгийг онцолж байгаа юм.