МСБХ-ны Үндэсний Дээд лигийн 2022/23 оны улирлын эрэгтэй лигийн плэйоффын тав дахь өдрийн буюу даваа гарагийн эхний тоглолт Эрдэнэт Майнерс, Налайх Бизон багуудын цувралын гурав дахь тоглолт явагдаж 82-78 харьцаатай өндөрлөлөө. Эрдэнэт Майнерс баг хожил авснаар цувралыг 3-0 харьцаатай итгэл төгс тэргүүлээд эхэлсэн бол Налайх Бизон баг дараагийн тоглолтуудад хожигдох эрхгүй болоод байна. Эрдэнэт Майнерс баг одоо 1 хожил авахад хагас шигшээд шалгарах юм.

Тоглолтын баатар: Хоёр багийн цувралын эхний 2 тоглолтод 17.0 минут дунджилж нэг ч оноо авч чадаагүй байсан Г.Ган-Эрдэнэ өнөөдөр цувралын гурав дахь тоглолтод 12 оноо, 5 самбар, 5 оновчтой дамжуулалт өгч багаа хожил авахад том тус хүргэлээ.

Тоглолтын эргэлтийн цэг: Тоглолтын турш 16 удаа хоёр багийн онооны тэргүүлэл өөрчлөгдсөн нь тоглолт өгөө аваатай болсныг илтгэх буй. Тоглолтын цаг сүүлийн 4 минут руу орж онооны харьцаа 74-74 байхад Т.Санчирын дараалан 5 оноо авснаар Эрдэнэт Майнерс баг тоглолтын хэмнэлийг өөрсдийн талд эргүүлж чадсан юм.

Статистик худлаа хэлдэггүй: Налайх Бизон баг багаараа 8 оновчтой дамжуулалт өгсөн бол Эрдэнэт Майнерс баг 18 оновчтой дамжуулалт өгсөн байна.