БНСУ-ын Ерөнхийлөгч Пак Гын Хегийн найз Чой Сун Шил гэгч төрийн тэргүүнтэй дотно байдлаа ашиглан томоохон компаниудаас их хэмжээний хөрөнгийг хандив нэрийдлээр өөрийн сандаа төвлөрүүлсэн гэх үндэслэлээр баривчлагдсан билээ. Түүнчлэн, улс төрийн үйл хэрэгт хөндлөнгөөс оролцож, Ерөнхийлөгчийн хэлэх үгийг хүртэл зааварлаж байсан нь баримттайгаар ил болсон байдаг.

 

Ерөнхийлөгч Пак Гын Хе найздаа өөрийн хэлэх үгээ илгээж, улс төрийн үйл хэрэгтээ Чой Сун Шилийг оролцуулж байсан нь томоохон корпорациудаас авлига авах нөхцлийг бүрдүүлсэн хэмээн зарим эх сурвалж онцолж байгаа юм.  Харин дуулиан дэгдсэний дараа Пак хоёр ч удаа ард иргэддээ хандсан мэдэгдэл хийж, “Бүгд миний алдаа” хэмээн хэргээ хүлээж, шаардлагатай гэж үзвэл  хуулийн байгууллагад очиж, байцаалт өгөхөд бэлэн гэдгээ илэрхийлж байв.

 

Чой Сун Шилийн хэргийг мөрдөх тусгай баг ч Ерөнхийлөгчөөс мэдүүлэг авахаа мэдэгдэж, өдөр хүртэл товлосон ч эдүгээг хүртэл биеллээ олоогүй. Гэхдээ Пакыг гэмт хэрэгтэн гэдгийг зарласан удаатай. Ингэснээр БНСУ-ын түүхэн дэх анхны эмэгтэй Ерөнхийлөгч гэх тодотголоо Пак Гын Хе анхны гэмт хэрэгтэн Ерөнхийлөгч нэрээр сольсон юм.

Тэгвэл ард иргэд нь Ерөнхийлөгчөө суудлаасаа буухыг шаардсан томоохон хэмжээний эсэргүүцлийн жагсаалыг хоёр долоо хоног дараалан зохион байгуулсаны дараа төрийн тэргүүн   өөрийн биеэр Прокурорын газарт очиж байцаалт өгөхөөс  татгалзжээ. Түүний өмгөөлөгч Ёо Ён Ха мэдэгдэл хийхдээ “Ерөнхийлөгч завгүй, товлосон ажил ихтэй байгаа учраас прокуроруудад мэдүүлэг өгөх, энэ хэргийг мөрдөн шалгахад хамтран ажиллах боломжгүй” гэх тайлбар хийсэн байна. Энэ долоо хоногийн мягмар гарагаас хэтрүүлэлгүйгээр өөрийн биеэр хүрэлцэн ирж мэдүүлэг өгөхийг прокурорууд Пакаас өмнө нь хүссэн юм. 

 

Ерөнхийлөгч ийнхүү хэрэгт холбогдсны дараа сөрөг хүчнийхэн ч байдлыг өөрсдөдөө ашигтайгаар эргүүлэхийг хичээж эхэллээ. Тэд хэд хэдэн удаа одоогийн Ерөнхийлөгчийг албан тушаалаасаа огцрохыг шаардсанаас гадна энэ лхагва гарагт  өнөөгийн Ерөнхийлөгчид итгэл үзүүлэх эсэх асуудлаар санал хураалт явуулах хуулийн төслийг боловсруулж парламентад өргөн барихаар  төлөвлөжээ. Улс төрийн жижиг хүчний тоонд багтах Ардын нам болон Тобуро намын төлөөлөгчид энэ талаар өчигдөр мэдэгдсэн юм. 

 

Сөрөг хүчний үзэж байгаагаар Ерөнхийлөгч Пак Гын Хэе Үндсэн хууль зөрчсөн, мөн авлига хээл хахуулийн, эрх мэдлээ урвуулан ашигласан, улсын нууцыг задраасан зэрэг нь итгэл үзүүлэх эсэх асуудлаар санал хураалт явуулах хангалттай шалтгаан болох гэнэ.  Энэ удаагийн дуулиан шуугиан эрх баригч Сэнүри намын рейтингэд ч нөлөөлж эхлэв. Ерөнхийлөгч, түүний найзыг тойрсон дуулианы улмаас “Сэнүри” намын нэр хүнд найман долоо хоногийн турш тасралтгүй унасан үзүүлэлттэй байна.

 

“Real Meter” компаниас явуулсан судалгаанаас үзвэл, тус намыг дэмжигчдийн эзлэх хувь өнгөрсөн долоо хоногт 2.8 хувиар буурснаар 16.2 хувь болжээ. Ингэснээр эрх баригч намыг дэмжигчдийн тоо тус улсын хамгийн жижиг нам болох Ардын намыг дэмжигчдийн тооноос ч бага болж ирсэн байна.