Монгол Улсын хөгжлийг шинэ түвшинд хүргэх зэсийн шинэ ордыг нээгээд байна. Дэлхий даяр зэсийн эрэлт нэмэгдэх болсон энэ цаг үед монголчууд бас нэгэн шинэ ордоо хүлээн авах түүхэн цаг үед иржээ. Орхон аймгийн Баян-Өндөр, Жаргалант сумдын нутагт хийсэн хайгуулын үр дүнд Оюут нэртэй  шинэ орд газрыг нээсэн билээ.

Хайгуулын урьдчилсан үр дүнгээр тус ордыг  357 сая тонн хүдрийн нөөцтэй гэж тогтоогоод байна. Энэ нь улсын төсвийн хамгийн том түшиг, тулгуур болсоор ирсэн Эрдэнэт шиг шинэ, том орд нээгдэж, монголчуудад ахуй амьдралаа дээшлүүлэх, ашиг орлогоо нэмэгдүүлэх, хөгжил дэвшлийг хурдасгах шинэ боломж гарч байна гэсэн үг юм. Монгол Улсын Ерөнхий сайд Г.Занданшатар Оуют ордыг ашиглалтад бэлтгэх үйл явцтай газар дээр нь танилцлаа.

Ерөнхий сайд Г.Занданшатар энэ үер " "Оюут" ордыг түшиглэн жилд 5-10 сая тонн хүдэр боловсруулах хүчин чадалтай баяжуулах үйлдвэр барих ТЭЗҮ боловсруулах үүрэг, даалгавар өглөө. Энэ тооцооллоор авч үзвэл Оюут ордыг 30-35 жил ашиглах юм.

"Эрдэнэт" үйлдвэрийн геологичид хайгуулын ажлыг бие даан гүйцэтгэжээ. Ордыг ашиглах зураг төсөл болон бүтээн байгуулалтад тус үйлдвэрийн шилдэг инженерүүд ажиллана.

Оюут орд нь Эрдэнэтийн овоо ордоос найм орчим км, Үйлдвэрлэл технологийн паркийн дэд бүтцээс гурав км зайд оршиж байгаа нь дэд бүтцийн хувьд нэн таатай орчин, нөхцөл юм.

Оюут зэсийн ордыг нээснээр Үндэсний баялгийн сан арвижиж,  үйлдвэр дагасан Эрдэнэт хот, Орхон аймаг, Хойд бүс цаашлаад Монгол Улсын нийгэм, эдийн засгийн хөгжилд том түлхэц болно.

Монгол Улсын Засгийн газраас Орхон, Булган аймгийн нутагт ашигт малтмал хайх эрхийг "Эрдэнэт үйлдвэр" ТӨҮГ-т олгож, 2023 оноос Оюутын ордын хайгуулыг эхлүүлжээ. Тус ордын хүдрийн нөөцийг 357 сая тонн, цэвэр зэсийн хэмжээ 1.1 сая гаруй тонн гэж тогтоогоод байна. Хайгуулын урьдчилсан үр дүнгээр зэсийн агууламж 0.32 хувьтай гэж тогтоожээ. 1972 онд Эрдэнэтийн овоо ордыг 521.7 сая тонн хүдэр байна хэмээн тогтоож 34 жил ашиглахаар төлөвлөж байсан. Шинээр нээгдсэн Оюутын  ордыг энэ жишигтэй харьцуулахад даруй 30 жил ашиглах нөөц юм гэж уг ордын төслийг удирдсан "Эрдэнэт үйлдвэр"-ийн ерөнхий  геологич Д.Алтанхуяг онцлов. Одоогоор Эрдэнэт үйлдвэр Хам баяжуулалтын  нэг, хоёрдугаар секторын үйлдвэрийг нэмээд энэ жилд 40 сая тонн зэс баяжуулж түүхэн дээд хэмжээнд хүрээд байна гэж "Эрдэнэт үйлдвэр" ТӨҮГ-ын ерөнхий инженер Д.Батмөнх тодотгов. Баяжуулах үылдвэрийг шинээр байгуулснаар бүтээгдэхүүнийг нэмэлтээр үйлдвэрлэж өнөөгийн хүрсэн түвшнийг бууруулахгүйгээр хадгална. Хүдрийн нөөцийг өсгөж, Эрдэнэт үйлдвэрийг олон жил тогтвортой ажиллуулснаар улс, орон нутгийн төсөв, татварт бүрдүүлэх орлогыг хадгалж, үйлдвэр дагасан хөгжлийн шинэ шатанд Монгол Улсыг хүргэхэд чухал нөлөөтэй гэж "Эрдэнэт үйлдвэр" ТӨҮГ-ын ерөнхий захирал Г.Ёндон онцлов.

Эх сурвалж: “Зууны мэдээ” сонин

2025 ОНЫ ЕСДҮГЭЭР САРЫН 8. ДАВАА ГАРАГ. № 167 (7664)

Уншигч Танд “Зууны мэдээ” сонины нийтлэлтэй холбоотой санал, шүүмжлэл, хүсэлт байвал zuuniimedee@gmail.com хаягаар илгээгээрэй.