Оросын “Вагнер” хувийн цэргийн бүлэглэл Беларусьт шилжиж байршихтай холбоотой үүсч болзошгүй аливаа аюулаас НАТО гишүүн орнуудаа хамгаалахад бэлэн гэж мэдэгдсэн байна.

Тус хөлсний цэргийн арми Беларусьт байрласнаар НАТО-гийн гишүүн Зүүн Европын орнуудад тогтворгүй байдал үүсч болзошгүй гэдэг болгоомжлолыг Польш, Литва зэрэг улс илэрхийлээд байна.

"“Вагнер” бүлэглэлийн цуврал алуурчид Беларусьт байрших нөхцөлд хөрш зэргэлдээ бүх улс тогтворгүй байдал үүсэх аюул улам өндөрсөнө” гэдэг байр суурийг Литвийн Ерөнхийлөгч Гитанас Науседа Гаагад НАТО-гийн Ерөнхий нарийн бичгийн дарга Йенс Столтенберг болон энэ эвслийн холбоотон 6 орны удирдагчидтай хийсэн уулзалтын дараа мэдэгдсэн байна.

Польшийн Ерөнхийлөгч Анжей Дуда мөн “Вагнер” хөлсний цэргийн армийн учруулж болзошгүй аюулын талаарх сэдвийг ирэх сарын 11, 12-нд Литвийн Вильнюст чуулах НАТО-гийн дээд хэмжээний уулзалтаар хэлэлцэх асуудлын тоонд орно гэж найдаж байгаагаа илэрхийлжээ.

“Энэ бол үнэхээр ноцтой, маш түгшүүртэй асуудал учраас бид дорвитой шийдвэр батлах ёстой. НАТО-гийн зүгээс туйлын, маш хатуу хариу арга хэмжээ шаардлагатай” гэж Дуда мөн дээрх уулзалтын дараа мэдэгдсэнийг “Ройтерс” уламжилсан байна.

НАТО-гийн Ерөнхий нарийн бичгийн дарга Йенс Столтенбергийн тухайд одоогоор “Вагнер”-ын хүчнийхэн Беларусьт шилжиж байршсанаас учирч болох үр дагаврыг тооцоход эрт. Гэхдээ тус эвсэл Москва болон Минскийн зүгээс учирч болох аливаа эрсдэлээс НАТО өөрийн харьяаны бүх нутаг дэвсгэрийг хамгаалахад бэлэн гэж мэдэгджээ.

“Вагнер” бүлэглэлийн толгойлогч Евгений Пригожиний тухайд өнгөрсөн бямба гарагт Оросын цэргийн эрх баригчдын эсрэг бослого дэгдээж, Москва руу цэргээ хөдөлгөсөн байх үед нь Кремльтэй зуучилсан Беларусийн Ерөнхийлөгч Александр Лукашенкотой тохирсон ёсоороо Беларусьт очсон байж магадгүй гэдэг мэдээлэлтэй байна.

Үүний зэрэгцээ АНУ-ын Сангийн яам Kросын хувийн цэргийн “Вагнер” бүлэглэл, түүнийг үндэслэгч Евгений Пригожинтой холбоотой нэр бүхий 4 компани, Оросын нэг иргэний эсрэг хориг тогтоосноо мэдээллээ.

Тус хөлсний цэргийн бүлэглэлийн үйл ажиллагааг санхүүжүүлэх зорилготой алтны наймаанд оролцсон Төв Африкийн БНУ, АНЭУ болон Орос дахь компаниуд энэ хоригт өртсөн байна.