Баруун-Урт-Улаанбаатар чиглэлийн А2001 дугаартай улсын чанартай авто замд  замын байгууламжаар зорчиж байгаа тээврийн хэрэгслээс төлбөр авах цэг барьжээ.

Тус төлбөр хураах цэгийн барилга, цахилгаан хангамж, авто замын өргөтгөлийн ажлыг “Норкут констракшн” ХХК-ийн түншлэлээр 230 сая төгрөгийн төсөвт өртгөөр гүйцэтгүүлэн 2016 оны наймдугаар сарын 27-нд дуусгаж, улсын комисс хүлээн авахад бэлэн болоод байна.

Зам, замын байгууламж ашигласны төлбөрийг зорчигч тээврийн хэрэгслээс суудлын тооноос хамааран 1000-3000 төгрөг, ачаа тээврийн хэрэгслээс 2000-10000 төгрөгөөр тооцож авах юм.

Орлогыг улсын авто замын санд төвлөрүүлэх бөгөөд Төлбөр авах цэгийн үйл ажиллагааны зардлыг тус сангаас санхүүжүүлнэ.