Соёлын яамнаас энэ сарын 12-14-ний өдрүүдэд нйслэл, 21 аймгийн дунд “Нүүдэлчин Монгол-2022” соёлын биет бус өвийн наадмыг зохион байгуулна. 

Соёлын биет бус өвийн их наадмаар 21 аймаг, нийслэлийн шилдэг өвлөн уламжлагч нарын зан үйлийн үзүүлбэр, язгуур урлагийн тоглолт, гар урлалын үзэсгэлэн, соёлын биет бус өвийг таниулан сурталчлах арга хэмжээ, уралдаан, тэмцээн, соёлын бүтээлч үйлдвэрлэл, үзэсгэлэн худалдаа, орон нутгийн онцлогийг харуулсан уламжлалт хоол хүнс, идээ ундааны фестиваль, шилдэг өвлөн уламжлагч болон нүүдэлчдийн хүүхдийн тоглолт зэрэг олон талт үйл ажиллагаа зохион байгуулах юм. 

      Тус наадамд оролцохыг хүссэн оролцогчдын сонгон шалгаруулалтын зарыг түгээж өчигдөр  Соёл урлагийн газраас нэгдүгээр шатны сонгон шалгаруулалтыг Ёс заншлалын өргөөнд зохион байгуулав.   Эх хэл, аман уламжлал, илэрхийллүүд, ардын язгуур урлаг, уламжлалт баяр наадам, зан үйл, ёс, тоглоом наадгай, уриа дуудлага, байгалийн болон сав шим ертөнцийн тухай мэдлэг, зан үйл,  уламжлалт арга ухаан, мал маллах арга ухаан, уламжлалт гар урлал зэрэг   долоон төрлийн хүрээнд оролцогчдыг бүртгэж сонгон шлагаруулалтыг зохион байгууллаа.  

Тухайлбал, уламжлалт гар урлалын төрлийн нэгдүгээр шатны сонгон шалгаруулалтад  20 урлаач 40 гаруй нэр төрлийн бүтээгдэхүүнээр оролцсон бол  ардын язгуур урлаг, бий биелэгээнд нийт 60 гаруй өв тээгчид оролцлоо.  Нэгдүгээр шатны сонгон шалгаруулалтад оролцож чадаагүй өв тээгчдэд  дахин сонгон шалгаруулалт нээлттэй болохыг зохион байгуулагчид хэллээ.