Орхон аймаг дахь Төрийн албаны зөвлөлийн салбар зөвлөлөөс “Төрийн албан хаагчдыг чадавхжуулах” сургалтыг өнөөдөр зохион байгууллаа. Удирдлагын академийн багш, доктор Я.Бямбаяр Засаг захиргаа нутаг дэвсгэрийн нэгж, түүний удирдлагын тухай хуулийн шинэчилсэн найруулга, Доктор Д.Байгаль Төрийн албаны сургалтын тогтолцоо, Төрийн албан хаагчийн сургалтын хөтөлбөр боловсруулах хэрэгцээ, шаардлага зэрэг сэдвээр тус тус сургалт мэдээлэл өглөө

Сургалтын эхэнд аймгийн ИТХ-ын нарийн бичгийн дарга бөгөөд Төрийн албаны зөвлөлийн Орхон аймаг дахь салбар зөвлөлийн гишүүн Д.Эрдэнэцэцэг “Энэ оны нэгдүгээр сарын 1-нээс улс орон даяар олон хууль хэрэгжиж эхэлсний нэг нь Монгол Улсын Засаг захиргаа, нутаг дэвсгэрийн нэгж, түүний удирдлагын тухай хууль, 2019 оноос хойш хэрэгжиж байгаа Төрийн албаны тухай хуулийг хэрэгжүүлэхэд бид хамтран ажиллаж ирсэн.

Тиймээс Төрийн албан хаагчдыг чадавхжуулах сургалт үр өгөөжтэй байна гэдэгт итгэл дүүрэн байгаагаа илэрхийлэв. Монгол Улсын урт хугацааны хөгжлийн бодлогыг тодорхойлсон “Алсын хараа-2050” бодлогын баримт бичгийн “Ухаалаг засаглал” зорилтод “Төрийн албан хаагчдын мэргэшсэн тогтвортой байдлыг хангах, мэдлэг чадвартай төрийн албан хаагчдыг бүрдүүлж тогтвортой ажиллуулах” тухай чухлаар тусгасан. Түүнчлэн өнгөрсөн жил баталсан “Шинэ сэргэлтийн бодлого” баримт бичигт зургаан үндсэн зорилт тодорхойлсны нэг нь “Төрийн албаны бүтээмжийг дээшлүүлэх” тухай юм. Бүтээмж гэдэг илүү бага зардлаар илүү үр дүнтэй ажиллах тухай ойлголт. Төрийн албаны хүрээнд төрийн байгууллагуудыг илүү өндөр бүтээмжтэй ажиллуулах нь юу юунаас чухал байгааг доктор Д.Байгаль мэдээлэлдээ онцолсон.

Мөн тэрээр “Дэлхийн улс орнуудад Төрийн албаны шинэтгэлийн тухай асуудал сүүлийн 30 жил ярьж байна. Хууль гаргаад эсвэл нэг бодлогын баримт бичиг гаргаад сайжруулчихдаг зүйл биш. Шинжлэх ухааны үндэслэлтэй байх ёстой. 1990-ээд оноос Төрийн албаны үр ашиг, үр нөлөөг сайжруулах тухай зорилтуудыг дэвшүүлж ирсэн. Үр ашиг дээшлүүлнэ гэчхээд нөгөө талдаа бүх зүйлийг хэмнээд байх юм уу гэдэг асуулт гарч ирнэ. Хэмнэх нь зөв. Үр ашигтай байх нь зөв. Тэр хэмжээгээр нөгөө талд гарч байх эерэг үр дүн нь үр нөлөө дээшлэх юм. Өөрөөр хэлбэл, төрийн үйл ажиллагаа иргэдэд үр дүнтэй хүрч байх ёстой” гэсэн. Сургалтад сумдын ИТХ-ын нарийн бичгийн дарга, ЗДТГ-ын дарга, багийн Засаг дарга нар болон нутгийн захиргааны байгууллагуудын удирдах болон гүйцэтгэх ажилтнууд, мэргэжилтнүүд хамрагдлаа.