Эрүүл мэндийн яамнаас коронавирусийн талаарх 17:00 цагийн мэдээлэл хийлээ. ХӨСҮТ-ийн Тандалт судалгааны албаны дарга А.Амбасэлмаа "Өнөөдөр 11:00 цагаас хойш 17:00 цаг хүртэл голомтот халдварын ойрын хавьтлын 56 хүнд шингжилгээ хийхэд бүгд СӨРӨГ гарсан. Сэлэнгэ аймагт ажиллаж буй багийн мэдээллээр 181 хүнд түргэвчилсэн тестийн шинжилгээ хийхэд бүгд сөрөг гарсан. Өнөөдрийн 17:00 цагийн байдлаар Монгол Улсад батлагдсан тохиолдол нэмж бүртгэгдээгүй. Улаанбаатар хотод 9, ойрын хавьтал 8 байна. Ойрын хавьтлын тохиолдлыг үргэлжлүүлэн тандаж байна. Ойрын хавьтлын тоо нэмэгдэж 348 болсон бөгөөд үүнээс 76 хүний шинжилгээ үргэлжлэн хийгдэж байна. Хоёр дахь хавьтлын 2,000 гаруй хүний шинжилгээг хийх ёстойгоос 400 гаруй шинжилгээ үргэлжлэн хийгдэж байна. Нийт 348 ойрын хавьтлын 272-т нь иж бүрэн шинжилгээ хийгдсэн. Хоёр дахь давтан шинжилгээг 48 хүнд, гурав дахь давтан шинжилгээг найман хүнд хийсэн байна.

Харин Хэнтий аймгийн сэжигтэй тохиолдлын тухайд ХӨСҮТ-ийн Тандалт судалгааны албаны дарга А.Амбасэлмаа, улсын хэмжээнд эрүүл мэндийн байгууллагууд хүн амын дунд коронавирусийн халдварын тархалтыг эрж хайх зорилгоор түргэвчилсэн тестээр тандалтын шинжилгээ хийж байгаа. Хэнтий аймагт тандалтын журмаар хийсэн гурван хүний түргэвчилсэн шинжилгээний хариу эерэг гарсан. Гэхдээ энэ нь коронавируст халдварын батлагдсан тохиолдол гэсэн үг биш. Хэнтий аймаг дахь гурван иргэнийг тусгаарлаад ПСР шинжилгээг Дорнод аймаг руу явуулсан бөгөөд энэ нь одоогоор батлагдаагүй" гэв.