Коронавируст халдварын цаг үеийн нөхцөл байдлын талаар ЭМЯ, Дэлхийн эрүүл мэндийн байгууллага, ХӨСҮТ-ийн холбогдох эх сурвалжаас мэдээлэл өгч байна. ХӨСҮТ-ийн Тандалт судалгааны албаны дарга А.Амбасэлмаа "Наймдугаар сарын 11-нд ХӨСҮТ-ийн вирус судлалын лаборатори болон Дархан-Уул аймгийн вирус судлалын салбар лабораторид нийт 677 хүнд шинжилгээ хийхэд коронавирус илрээгүй. Үүнд Прагаас ирсэн 250 хүн, Солонгосоос ирсэн 260 хүн, тусгаарлах байранд ажиллаж байгаа 21 эмч, ажилтан, Алтанбулагийн боомтоор орж ирсэн 21 жолоочийн анхны шинжилгээнээс коронавирус илрээгүй. Баруунхараа хотод тусгаарлагдсан 20 хүний шинжилгээнээс коронавирус илрээгүй. Өнөөдөр CoVid19 халдвар авсан зургаан хүн эдгэрч, ХӨСҮТ-өөс гарлаа. Эдгэсэн зургаан хүн нь энхийлэгч сахиулагчид болон Истанбулаас ирсэн иргэд байна. Манай улсад CoVid19 халдварын батлагдсан тохиолдол 293 байгаагаас 269 нь эдгэрч, эмнэлгээс гарчээ. Эдгэрсэн хүмүүсийн 50 хүн нь сувилалд, 26 нь гэрт байна. 193 хүний ажиглалт тандалтын хугацаа дууссан. Одоогийн байдлаар халдвартын клиникт 24 хүн эмчлүүлж байна. Харин ажиглалт, тандалт, тусгаарлалтад 43 хүн байгаа. ХӨСҮТ-д тусгаарлагдсан нэг хүний биеийн байдал маш хүнд байгаа. Тодруулбал, халдвартын клиникт наймдугаар сарын 6-нд ирсэн нэг хүн эрчимт эмчилгээний тасагт эмчлүүлж байгаа” гэсэн юм. Тэрээр үргэлжлүүлэн "Нэгдүгээр сарын 8-наас эхлэн тандалт судалгаа явуулсан. Нийт 18 мянга 793 хүнийг шинжилгээнд хамруулсан. Үүнээс 293 тохиолдлыг баталсан. Үүний 70.3 хувь буюу 206 хүн нь эрэгтэй, 29.7 хувь буюу 87 нь эмэгтэй байна. Насны хувьд 6-80 насныхан байна. 15-аас доош насны хүүхэд найм байна" гэлээ.