Өнөөдөр Бүгд найрамдах ардчилсан Солонгос ард улс байгуулагдсаны түүхт 69 жилийн ой тохиож байна. Түүхийн хуудас сөхвөл, Өмнөд Солонгост 1948 оны тавдугаар сард парламентын сонгууль болж, тухайн жилийн наймдугаар сарын 15-нд БНСУ-ыг зарлан тунхагласны дараа Хойд Солонгост Ардын дээд хурлын сонгууль явуулж, мөн оны есдүгээр сарын 9-нд БНАСАУ-ыг зарлан, тунхаглаж байсан гэдэг.

Хойд Солонгос ийн Үндэсний баяраа тэмдэглэж буй бол эсрэгээрээ Өмнөд Солонгос, Япон аюулгүй байдлаа чангатгаж, цэрэг цагдаагийн албан хаагчид нь өндөржүүлсэн бэлэн байдалд ажиллаж байгаа аж. Пхеньян энэ сарын 3-нд устөрөгчийн бөмбөг туршиж, бүс нутаг даяар асар хүчтэй хиймэл чичиргээн мэдрэгдсэн байдаг.

Тэгвэл өнөөдөр ч гэсэн баярынхаа өдөр дахин цөмийн зэвсэг туршиж магадгүй байгаа тухай БНСУ-ын цэргийн штабаас мэдээлж байгаа юм. Учир нь өнгөрсөн жилийн энэ өдөр тус улс тав дахь удаагийн цөмийн зэвсгээ туршиж байсан билээ.

Цэргийн штабын генерал “Одоогийн байдлаар Хойд Солонгост сэжигтэй хөдөлгөөн илрээгүй байна” гэж хэвлэлд ярьсан байна.