Амралт зугаалгын энэ үед Сэлэнгэ, Төв аймгийн нутагт хэд хэдэн түймэр гарсны улмаас Онцгой байдлын алба хаагчдад туслах хандивын үйл ажиллагаа сошиал сүлжээнд идэвхтэй өрнөж, зүрх сэтгэлээрээ нэгдсэн залуус тусламжийн гараа сунгасаар байгаа.

Тэдний нэг нь УИХ-ын гишүүн М.Оюунчимэг. Тэрбээр өчигдөр Онцгой байдлын Ерөнхий газарт очиж, гал түймэртэй тэмцэх үйлсэд нэгдэн, нэг сарын цалингаа хандивласан юм.

Тэгвэл сайн үйлсийн аянд нэгдсэн М.Оюунчимэг гишүүнээс илүүтэй цахим сүлжээний гол сэдэв болсон эрхэм бол Н.Амарзаяа гишүүн.

Тэрбээр хэн хүнгүй гал түймэртэй тэмцэх аянд нэгдэж, эх орон шатаж дууслаа хэмээн халаглан интернэт хэрэглэгчдийн давалгааг зүсч хармаг жимс амтлан амарч яваагаа нүүр номоороо гайхуулсан нь олон хүний дургүйцлийг төрүүлээд амжлаа.

Тодруулбал, Өмнөговь аймгийн сонгогчдын итгэлийг хүлээж, УИХ-д сонгогдсон Н.Амарзаяа гишүүн хармаг жимс амталж яваа зургаа нийтэлж, “Хармаг жимсний амт гэж ванлий. Ид ургаж байна аа. Говийн юм бүхэн гайхамшиг. Үнэхээр говь сайхан  нутагт төрж өссөнөөрөө бахархнам би” хэмээх тайлбар зүүсэн байв.

Гэвч, түүний уг нийтлэл шүүмжлэл дагуулсны улмаас эрхэм гишүүн нийтэлснээсээ хойш хэдхэн цагийн дараа фэйсбүүк хуудаснаасаа  устгажээ.