Эзэн Чингис хааны өлгий нутаг Ханхэнтий нутгаас төр түшилцэхээр УИХ-д сонгогдсон хамгийн залуу гишүүн Д.Гантулгыг тойрсон дуулиан наадам, амралт зугаалга, гал түймрийн мэдээ мэдээлэл дунд хэсэгтээ дарагджээ.

Гэхдээ даравч дардайна, булавч бултайна гэгчээр төрийн түшээ хүний олноо хүндлэгдсэн имижийг шороотой хутгаж орхисон залуу гишүүнд эрх баригч намын зүгээс эсвэл ёс суртахуунгүй үйлдлийнхээ  хариуцлагыг өөрөө хүлээх  болов уу гэсэн хүлээлт төрөө дээдэлж, төрийн соёмбондоо сүсэглэдэг жирийн ардын зүрхэнд уяатай яваа.

Төрийн түшээ хүний үндсэн үүргээ биелүүлдэггүй, чуулганы хуралдаанд барагтай бол үзэгддэггүй ч, жирийн иргэдийн тоостой хувцастай орохоос  хүртэл жийрхдэг Төрийн ордны танхимд Монгол төрийн бэлгэдэл алтан соёмбоны дор ор хөнжлийн явдлынхаа талаар мэдэгдэл хийж ёс зүй гэгчийг уландаа гишгэснээ өөрийн үг, үйлдлээр хүлээн зөвшөөрсөн эрхэм гишүүн одоо хаана явна вэ.

Гадны улс орны жишгээс харахад, Д.Гантулга  улс төрийн аль нэг нам эвсэлд харьяалагдаагүй ч, өөрийн чадвар чансаагаараа дэлхийд үнэлэгдэж яваа шинэ эриний залуусаас уучлалт гуйж, ичгүүргүй үйлдлийнхээ төлөө сайн дураараа огцрох байлаа. Гэсэн ч, эрх баригч нам ч тэр, өнөөх шинэ үеийн төлөөлөл гэж өөрийгөө дөвийлгөдөг залуу гишүүн ч таг чиг.  БНСУ-д экс Ерөнхийлөгч Пак Гын Хег огцруулахыг шаардсан томоохон хэмжээний жагсаалын үеэр зарим иргэд “Ерөнхийлөгч хадаатай албан тушаал биш, зүгээр л нэг төрийн албан хаагч” гэдгийг тодотгож байсан удаатай. Түүнтэй нэгэн адил, УИХ-ын гишүүн гэдэг хэмжээлшгүй эрхтэй эзэн хаан биш, тэр ердөө улс орны бодлогыг тодорхойлоход гар бие оролцохоор сонсогдсон төрийн албан хаагч төдий. Алдаа гаргавал хариуцлага хүлээх нь зүйн хэрэг билээ.

Өнгөрөгч онд Японы парламентын 35 настай залуу гишүүн Кэнсүкэ Мияазаки  Д.Гантулга гишүүнийг тойрсон дуулиантай ижил шалтгаанаар өөрийн хүсэлтээр огцорсон юм. Тухайн үед түүний гэргий мөн эрх баригч Либериал Ардчилсан намын гишүүн Мэгүми Канэко амаржиж хүү төрүүлсэн үе давхацсан байдаг. Гэтэл эхнэрээ төрөхөөс өмнө эрхэм гишүүний  бикини модель, мэргэжлийн кимоно мастер бүсгүйн Кёото дахь гэрээс гарч буй зураг орон нутгийн сонинд нийтлэгдэж томоохон дуулиан дэгдэж байсан юм.

Харин үүний дараа К.Мияазаки хэвлэлийн хурал зарлаж, толгой бөхийлгөн уучлалт хүссэн. Мөн “Миний зохисгүй үйлдлийн улмаас маш том асуудал үүслээ. Ард иргэдийн улс төрд итгэх итгэл алдрахад хүрсэнд гүнээ харамсч байна” хэмээж, албан тушаалаасаа огцорч буйгаа зарласан байдаг.

Гишүүнтэй нэр холбогдсон  бикини модель, кимоно мастер бүсгүй нэгдүгээр сарын 4-нд нээсэн чуулганы үеэр гишүүдийн кимоног хариуцаж ажилласан байдаг. Түүнээс хойш тэд  гурван удаа уулзсаныг К.Мияазаки өөрөө хүлээн зөвшөөрч, “Хамгийн сүүлд би түүний Кёотод харсан. Бидний хооронд ямар нэг ноцтой харилцаа байхгүй. Энэ талаар би эхнэртээ тайлбарласан” хэмээн мэдэгдсэн байдаг.

Өөрийг нь тойрсон дуулианы талаар тайлбар хийж, басхүү ард иргэдийн улс төрд, тэр дундаа улстөрчдөд итгэл нь алдрах вий гэсэндээ Японы парламент дахь  эрх баригч намын гишүүн  Кэнсүкэ Мияазаки огцорсон. Харин манайд эдүгээ эрх барьж буй МАН-ын гишүүн Д.Гантулга Төрийн ордны танхимд хэвлэлийн бага хурал зарлан саунд сууж, иргэн Цэрмаа гэх бүсгүйн түрхэн амьдарч байсан найзынх нь гэрт хоноглосноо өөрөө хүлээн зөвшөөрсөн атлаа намын нэр хүнд, ард түмний улстөрчдөд итгэх итгэл дээр дэвсэлж орхисноо  ойлгоогүй яваа бололтой.  Тэд огцордог, харин та огцрох болоогүй юу, Д.Гантулга гишүүнээ.